Төрскн келән хадһлхар

Сегодня, 13:52 | Общество, Таңһчин зәңгс, Зіњг, Сурєуль-эрдм

Сурһуль-эрдмин халхар төрскн кел хадһллһна төрәр шидр Баһ Буурла дунд сурһульд, «төгрг ширән» сүүр болв.

«Поликультурн сурһуль-эрдмин халхд тогтсн бәәдлд төрскн кел хадһллһн: шаңһа йосна сурһуль-эрдмин эрк биш күцәх зокалмуд болн сурһуль-эрдмин халхар тогтсн ни-негн бәәдл» гиҗ нерәдгдсн нәрн төрәр сүүрт күүндвр болсмн. Келн-улсин сурһуль –эрдмин сүүр болгч келнә болн сойлын зөөриг хадһллһна туст сүүрт орлцачнр ухан-тоолврарн хувалцв.
Эн өдрмүдт таңһчд бурятин багшнр гиичлҗ ирсн билә. Ах-дү республикәс ирсн гиичнр дамшлтарн хувалцад, сурһуль-эрдмин халхар ямаран шин тоот көдлмштән олзлҗахан медүлв. Улсин хоорндк залһлдаг батлх соньн кесг янз кичәлдән орулдгин тускар Бурятяс ирсн багшнр келҗ өгв.
Хальмг Таңһчин сурһуль-эрдмин министрин дарук Натра Антон, Ик Буурла муниципальн бүрдәцин толһач Көкән Арслң, Ик Буурла РМО-н сурһуль-эрдмин әңгин һардач Үлмҗин Заяна гиичнриг тосч авв.
Регион болһнд төрскн кел хадһллһна кергт цуг халхин нөкцлт кергтә болҗахиг эдн темдглв. Бурят келнә болн утх-зокъялын багшнр У.Б. Бадмаева, С.Р. Наманжуева, Т.Д. Ульзутуева, Д.Б. Ирчитуева соньн кичәлмүд давулв.
«Төгрг ширән» сүүрин йовудт һурвн бооцан батлҗ авгдв. Сурһуль-эрдмин делгрлтд орҗадг шин тоотыг батлсн тер һурвн зөвшәл багшнрин көдлмшт сән дөңцл болхмн. Хойр зөвшәл этносойлын делгрлтин төрмүдлә залһлдата. Сурһуль-эрдмин халхд батрсн авъясмудыг җирһлд орҗадг шин тоотла залһлдулҗадг агроклассмуд бүрдәлһнә төрәр һурвдгч зөвшәл батлгдв.
Тиигәд ах-дү хойр республикин багшнр төрскн келән хадһллһна кергиг цагин некврлә ирлцүлҗ күцәҗәхән медүлв.

ҖИРҺЛИН Кермн

Видео