Урһа модд хадһлхин төлә

Сегодня, 13:16 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр Элстд «Калмлес» бүрдәцин көдләчнрин төлә байрта йовдл учрв. «Урһа модд хадһллһн» шаңһа төсв күцәлһнә йовудт бүрдәцд өдгә цага шишлң техник йилһҗ өггдв.
Хальмг Таңһчин Толһач Хаска Бату, таңһчин залврин Ахлачин дарукин үүл дааҗадг Коҗан Санл, йиртмҗин көрңгин болн эргндк бәәдл харлһна министр Һооҗура Санл керг-үүлдврт орлцв.
– Мана таңһчд эргндән тег налана, тегәд урһа модд суулһхар шуннавидн. Мана нертә үүлдәч Басан Городовиков мел тиим күсл зүүҗ йовсмн. Эн чинртә көдлмшт эрк биш баһчудыг орлцулад, өвкнрин эклсн кергиг цааранднь давулхвидн, – гиҗ Бату Сергеевич иткүлв.
Хальмгин залврин Ахлачин дарукин үүл дааҗадг Коҗан Санлын келсәр, шаңһа төвин болн таңһчин һардврин нилчәр эн керг бүтәгдв, ач-тусан күргсн улст эн ханлтан өргв. Тер мет урһа модд хадһллһна болн фитомелиорацин халхар ик көдлмш күцәгдхинь бас темдглв.
Йиртмҗин көрңгин болн эргндк бәәдл харлһна министр Һооҗура Санл сүл җилмүдт «Урһа модд хадһллһн» шаңһа төсв күцәлһнә йовудт ямр көдлмш кегдсин тускар келҗ өгв. 2019 җиләс авн мана таңһчд ут тоодан 7500 гектар аһу һазрт урһа модд суулһгдсн болв. Ирлцңгү бүрдәцст болхла 46 трактор болн нань чигн шишлң кергслмүд хулдҗ авгдсн билә. Җил ирвәс эн көдлмшин кемҗән өсәд-өргҗәд йовна, тегәд эн туст кергән улм делгрүлхин төлә шин эв-арһс олзлад цаарандан күцәмҗтәһәр көдлхвидн, гиҗ Санл Вадимович иткүлв.
«Калмлес» бүрдәцд олн җилдән көдлсн Ольга Грекова ветеранмудын нерн деерәс бас ханлтан өргв. Энүнә келсәр, эк-эцкнь таңһчд урһа модд хадһллһна халхар олн җилдән көдлҗ йовсн болна.
Харһлтын чилгчәр «Калмлес» бүрдәцин эдлврт бәәсн өдгә цага шин техник мана регионд әәмшг уга бәәдл тогталһнд туслхнь лавта гиҗ ирлцңгү йовдлд орлцсн улс темдглв.
КАРСАНА Евгения

Видео