Баахн малчин хошт

Сегодня, 12:53 | Общество, Таңһчин зәңгс, Зіњг, Селәнә эдл-аху

Малчнрин төлә үвлзлһнә кем төгсәд, төл авлһна дааврта көдлмш гүргүдән орчксн бәәнә. Эн кемиг сән аштаһар давулхин төлә таңһчин фермермүд хаша-хаацан ясад, цуг тоотынь эртәснь белднә. Намрар Хальмг Таңһчин селәнә эдл-ахун министерствин зәңглсәр, АПК-н халхиг делгрүллһнә шаңһа көтлврин йовудт баһ биш шаңһа дем йилһгдв. Эн дөң урһмл урһалһна болн тохма мал өсклһнә кергүдт йовулгдсн билә. Хальмгин тәвн һар бүрдәц тохма мал асрҗана. Давсн җилин урһц хуралһна ашар мана таңһчин селәнә эдл-ахун көдләчнр дәкнәс ончрв. Тегәд малчнр шүрүн хот күцц кевәр белдәд үвлзлһнә кемиг сән аштаһар давулв, гиҗ темдглх кергтә.
Таңһчин райодын зәрм эдл-ахуст төл авлһна кем эртәр эклв. Эн үвл цаста болв чигн үвлзлһнә кем ик һару угаһар давв, гиҗ селәнә эдл-ахун министерств зәңглв.
Эн җилин зураһар цуг эдл-ахуст хөд ик зуудан мөрн сард хурһлхмн. Сән таал тогтаһад, чинәнь дор орсн малыг бордад, көк өвс өгәд, төл авлһна кемиг сән йовудтаһар күцәхнь лавта.
Көтчнрә района Сарпа селәнәс хол биш бәәдг хошт баахн малч Мутан Санл көдлҗәнә. Тодлхд, 1980 җилд энүнә эцкнь Борис Яковлевич эврә эдл-аху бүрдәһәд, малан асрад көдлсмн. Бичкнәснь авн көвүһән дахулад, теегт хө хәрүләд, мал өсклһнә кергт орлцулв. Кесг җил хооран дамшлтта малч Мутан Борис сәәһән хәәв, эндр болхла көвүнь эцкиннь кергиг цааранднь чадмгар давулҗана.
Мутан Санлын хошт бод мал болн хөд асргдҗана. Энүнд экнь Ирина Алексеевна болн үрән асрлһна амрлһнд бәәдг Заяна авальнь нөкд болна. Хадм эк бер хойр хамдан хотан белдәд, һуйрин зүүтә кегдлмүд шарҗ һарһад, кеер бәәцин сән таал тогтахар шунна. Үкрмүд мөөрәд, хөд мәәләд өдр экләд асхн ора чилдг. Һаза дулан болад, мал өдртән теегт идшлнә, тегәд үвлд белдсн малын хот әрвлгднә, гиҗ Санл келнә. Хаша-хаацан ясад, үвлд эдн даавртаһар белдсмн. Ветеринарн халхар болхла тәрлһ келһнә керг-үүлдврмүд бас цаг-болзгтнь давулгдв.
Одахн Мутан Санлын хошт үкрмүд экләд туһлад, хөд чигн хурһлҗана. Эндр болхла, төл авлһна халхар авсн зураһан күцәхәр эн зүткчәнә.
Өдгә цагт хошт көдлдг улс шаңһас олн зүсн дем авч чадҗана. Кергән делгрүллһнд эннь сән дөң-нөкд болна. Дәкәд болхла Хальмг Таңһчин Толһач Хаска Бату селәнә эдл-ахун халхар көдлҗәдг баахн фермермүдиг дөңнҗ, эднә көдлмшинь өөдәнәр үнлнә. Төл авлһна кем цаарандан давҗана. Таңһчин малчнр сән төл авхар зуралҗ, өдр-сө уга малан арднь орҗ хәләһәд, даавртаһар көдлҗәнә, гих кергтә.

КАРСАНА Евгения

Видео