Селәнә улст – эмчнрин туслмҗ

Сегодня, 17:32 | Общество, Таңһчин зәңгс, Зіњг

Хальмг Таңһчин Толһач Хаска Батун седвәрәр болн «Негдсн Әрәсә» партин Хальмг региональн әңгин «Эрүл-менд иргч» гидг төсвин йовудт бүрдәгдсн «Эрүл-менд бәәтн!» гидг керг-үүлдврин дарани девсң төгсхдән өөрдҗ йовна. Эн сарин эклцәс авн эмчнр таңһчин хол селәдт бәәдг әмтнә эрүл-мендин бәәдл шинҗлҗ дөңгән күргҗәнә. Ода деерән зуг Яшкулин, Баһ Дөрвдә болн Целинн райодт эмчнр одад уга.
Моһа сарин 18-д эмчнр Үстин района Үст селәнд одв. Эн өдр 61 күн эмчнрин хәләврт орв. Эмчнр гемтә-шалтгта, хуучта улст болн медәтнрт, цергә шишлң керг-үүлдврт орлцачнрт болн теднә өрк-бүлин гешүдт онц оньган тусхав. Тиигәд, эмчнр тавн күүнә гертнь одад, дор ормднь дөңгән күргҗ, эрүл-мендин бәәдлинь шинҗлҗ эмнлһнә туст сүв-селвгән өгв. Гемин уршгар эмнлһнд күрдг арһ уга улст эмчнр бийснь одад ирҗ дөңгән күргснд эдн ик ханлтан өргв. Эмчнрт бийән үзүлсн бәәрн улс дундас тавн күүнд эмнлһнд орад, эрүл-мендән батрулх селвг өггдв. Нег күн П.Жемчуевин нертә таңһчин эмнлһнә зүркнә әңгд эмнлүлгдх болв. Эн өдр селәнә күүкд улс бас эрүл-мендин бәәдлән шинҗлв. Авъяст тохрсар, «Эрүл-мендин төв» бүрдәцин мергҗлтнр селәнә әмтн дунд чик авг-бәрц батруллһна төрәр күүндәд, ямр нег гемәс саглуллһна халхар селвгән өгв.
Моһа сарин 20-д болхла «Эрүл-менд бәәтн!» гидг керг-үүлдвр Сарпан района Кануковский селәнд давв. Эн өдр 111 күн эмчнрт бийән үзүлв. Тедн дунд цергә шишлң керг-үүлдврт орлцсн нег күн болн СВО-д орлцачнрин өрк-бүлмүдин дөрвн гешүн ирҗ, эмчнрлә эрүл-мендин тускар күүндв. Эн керг-үүлдвр ямр нег гемиг эртәр илдкҗ цаглань эмнлһ эклх күслтәһәр давулгдна. Тегәд селәнә әмтн дунд 24 күүнд ямр нег гем түрүн болҗ илдкгдснь темдгтә. Эдн эмчнрин эмнлһ эклх болв. Дәкәд 27 күн немр шинҗллтд орх зөвтә. «Эрүл-менд бәәтн!» гидг керг-үүлдвр эн селәнд давулгдсна ашт 26 күн эрүл-мендин бәәдлән батрулх зөвтә болв, теднәс 5 күн П.Жемчуевин нертә таңһчин эмнлһнд орхмн, дәкәд нег күн Әәдрхнә зүркнә Төвд месллһ кехмн гиҗ шиидгдв.
Эн долан хонгт эмчнр Көтчнрә района Чкаловский болн Хар Һазра района Прикумский селәндт одв. Эн селәдин әмтн эмчнр ирснд бас байрлҗ, мергҗлтнрин сүв-селвг авхар ирв. Селәдин эмнлһсин көдләчнр урдаснь шинҗллт кеһәд, цус авв. Района эмнлһсин флюорограф болн маммограф олзлҗ, гүн шинҗллт кехин төлә ирлцңгү таал тогтав. Чкаловский селәнд эн өдр 120 күн эмчнр тал ирв. Эрүл-мендин бәәдлән шинҗлхәр ирсн улс дунд цергә шишлң керг-үүлдврин нег ветеран, СВО-д орлцачнрин өрк-бүлмүдин 9 гешүн бәәсмн. Цуһар эдн мергҗлтнрт бийән үзүләд, шинҗллт кев. Эмчнрин хәләврт орсн улсас 9 күн П.Жемчуевин нертә таңһчин эмнлһнд, дәкәд 4 күн Көтчнрә района эмнлһнд эрүл-мендән батрулх болҗ һарв. Тер мет 46 күн немр шинҗллт кеҗ, дәкнәс эмнүлгдх болв.
Маңһдур Яшкулин района Привольный селәнә бәәрн әмтн эмчнр ирхиг күләҗәнә. Ирх долан хонгт эмчнр Баһ Дөрвдә болн Целинн райодт одхмн гиҗ зуралгдҗана. Тиигәд «Эрүл-менд бәәтн!» гидг керг-үүлдврин дөрвдгч девсңгнь төгсхмн. Селәнә әмтнә эрүл-мендин бәәдл шинҗллһнә кергт орлцсн мергҗлтнр күцәсн көдлмшин аш дигләд, зуни кемд ямаран селәдт одхин туст зура батлхмн.
БАТАН Сәәхлә
ЗУРГТ: эмчнр Үстин района Үст селәнд одсн кем

Видео