Төрскн келнә чинринь өөдлүлҗ

Вчера, 14:01 | Общество, Таңһчин зәңгс, Зіњг, Сурєуль-эрдм

Одахн Элстд, багшнрин колледжин улд таңһчин сурһуль-эрдмин министерствин коллегийин сүүр болв. Энүнд райодын сурһуль-эрдмин заллтсин болн бүрдәцсин һардачнр орлцв. Сурһуль-эрдмин чинринь өөдлүллһнә туск төр энд хәләгдв. Салврин бүрдәцст шинрлтин төрмүд яһҗ күцәгдҗәхин, шалтгта бичкдүдт болн арвтнрт сурһулин ямаран таал тогтагдҗахин тускар тодрха күүндвр болв.

Тер мет 2026 җилд ЕГЭ болн ОГЭ өглһнә керг-үүлдврт белдлһнә төрмүдт коллегийд орлцачнр һол оньган тусхав. Эн җил 11-ч классиг төгсәҗәдг цуг арвтнр ЕГЭ шүүврән өгх. Тер шүүвриг болзгаснь урд өглһнә диг-дараг Әрәсән гегән-герлин Министерств йилһсн билә. Йирин кем болхла мөчн сарин 1-д эклх, сурһульчнр тууҗин, утх-зокъялын болн химийин шүүвр эн өдр өгх. 9-ч классан төгсәҗәдг сурһульчнр бас мөчн сарин эклцәр түрүн шүүврән өгх гиҗ зуралгдҗана, болв тер болзгнь сольгдад чигн бәәх. Ода Элстин болн райодын сурһульмудт шаңһа шүүврт белдлһнә керг дигтә-даратаһар күцәгдҗәнә.
Хальмг кел хадһллһна болн делгрүллһнә туск төрәр сүүрт орлцачнр бас тоолврарн хувалцв. Әрәсәд бәәдг келн-улсин кел даслһна болн хадһллһна туск Әрәсән Президентин зәрлг бәәнә. Тиим кевәр орн-нутгин һардвр чигн эн төрт һол оньган өгчәнә гиҗ келх кергтә. Сурһуль-эрдмин болн номин министерствин әңгин һардач Увшин Зоя эн төрәр һоллгч илдкл кев.
Төрскн кел хадһллһна төрәр һол зөрүллтиг таңһчин сурһуль-эрдмин министерств йилһҗ урднь зуралсн көдлмшән күцәҗәнә. Хамгин түрүнд хальмг келнә баһ наста мергҗлтнрин то икдүлх кергтә. Яһад гихлә ода көдлҗәдг багшнрас ик зунь наста улс болна. Цаг бәәтл баһ наста мергҗлтнриг белдх кергтә. Тер һоллгч көдлмшиг ода деерән Хальмг ик сурһулин хальмг филологин болн дорд үзгин шинҗллтин күрәлң күцәҗәнә. Нег үлү төрскн келәр немр сурһуль өгчәдг багшнр икәр керглгдҗәнә гиҗ Зоя Петровна темдглв.
Тер төриг хаһлхин төлә хамгин түрүнд урдаснь сурһульчнриг хальмг келнә багшин эрдм шүүҗ авхиг урмдулҗ багшнрин классмудын то икдүлх кергтә. Тер мет райодын, дунд сурһульмудын һардвр селәдин, района бәәрн баһчудыг хальмг келнә багшин эрдм даслһнд Хальмг ик сурһульд йовулх зөвтә. Хөөннь тавн эс гиҗ зурһан җилдән төрскн селәндән эс гиҗ райондан көдлх зөвтә гисн бооца батлх кергтә, баһчудт балһснла әдл таал тогтахла туста болх, тиигхлә эдн селәндән көдләд бәәхнь лавта.
Төрскн келнә багшнрин җалвинь чигн өөдлүлх кергтә, тиигчкәд ода баһчуд өдгә цагин кергсләр соньмсна. Теднә төлә электронн хальмг-орс болн орс-хальмг тольмуд һарһх кергтә, гиҗ сангдна.
Тиим көдлмшиг ода Хальмг ик сурһулин болн РАН-а Хальмг номин төвин номтнр дигтә-даратаһар күцәҗәнә. Тер көдлмшиг түргдүлхин төлә хазнас баһ биш мөңгн һарһгдхнь төрскнч седклтә әмтиг байрлулҗана.
Хальмг келнә сән даслур кергтә, ода 1-9-ч классмудын даслурмуд белдгдҗәнә. Тууҗин медрл чигн сурһульчнрт кергтә, тиигхлә эдн өвкнрин алдр кергиг улм сәәнәр медх, эннь төрскн кел даслһнд туслад бәәхнь лавта. Нертә номт Константин Максимов һардҗадг баг «Мана һазрин тууҗ. Хальмг Таңһч» гидг нертә тууҗин даслур 5-7 классмудын төлә үүдәҗ һарһв.
2026-2027 сурһулин җил күртл бичкдүдин садмудт хальмг кел дасхдг этносойлын янзта келн-улсин багмуд секх кергтә. Райодын ханьд чигн этносойлын янзта сурһульмуд тогталһна туск Улсин Хуралын (Парламентин) депутатнрин седвәриг сурһуль-эрдмин болн номин министерств бас дөңнҗәнә, түүнә төлә методикин халхар дөңгән күргхәр белн бәәнә.
Хальмг кел хадһллһна кергиг райодт, селәдт, Элстд цуг халхар күцәхлә, зака тогтагч седвәрмүд, сурһуль-эрдмин шин көтлврмүд, хальмг келәр бүрдәсн кесг керг-үүлдвр улм өргнәр бүтәхлә туста болх, тиигҗ хамцад бидн цугтан өвкнрин үлдәсн алдр зөөриг, төрскн келән, хадһлҗ, цааранднь делгрүлҗ чадхвидн.
ТҮРВӘН Һуна

Видео