Бурхн Багшт - көгҗмин йөрәл

Вчера, 13:36 | Общество, Таңһчин зәңгс, Зіњг, Бурхн-шаҗна төрәр

Хальмг Таңһчд сән нег авъяс тогтсн бәәнә. Бурхн Багштан, бурхн-шаҗна номд, шаҗна ном хадһлҗ тархаҗадг хувргудт нерәдҗ көгҗмин йөрәл белдлһн таңһчд дасгдсн сән йовдл болв. Эн җил таңһчин көгҗмчнр болн артистнр көгҗмин йөрәлән хөн сарин 17-д нерәдхмн. Хальмгин Шаҗн Лам гевш Тензин Чойдак эн евәлтә керг-үүлдврин эклц тәвсн ах дирижер Катан Саврла харһҗ күүндснә дару көгҗмин йөрәлин болзгнь йилһгдв.
Бурхн-шаҗна һурвн эрдньд нерәдсн көгҗмин керг-үүлдвр күцәлһн ода мана җирһлин салһгдшго әңгнь болв.
Шаҗна болн сойлын ик чинртә эн керг-үүлдвриг хөн сарин 17-д кехәр шиидснь хара йовдл биш. Бурхн-шаҗнд шүтдг әмтнд хөн сар хамгин евәлтә сар болҗ тоолгдна. Делкәд бәәдг бурхн-шаҗнд шүтдг олн келн-әмтн әрүн чинртә эн сард Үрс Сарин байриг темдглнә.
Тер өдр көгҗмчнр болн артистнр цуглрад, Бурхн Багшин Алдр гегәнд, терүнә номд, шаҗна номиг тархаҗ, олнд медүлҗ йовдг хувргудт нерәдҗ, көгҗмин йөрәлән өргхмн. Таңһчин оюни болн сойлын җирһлд ик чинр зүүдг эн үүлдврт әмтн оларн дурлҗ орлцна. Хальмг улсин көгҗмиг делгрүллһнд, баһчудыг келн-улсин авъясмудла таньлдуллһнд җил болһн кегддг эн керг-үүлдвр туслна. Келхәс, бурхн-шаҗна үүлдәчнрин нарт-делкән һурвдгч ик цуглрана кемҗәнд Хальмгин миңһн домбрч, көгҗмч, артист орлцсн оркестрин көгҗм цуглрсн улсиг хамцулҗ, хол һазрас ирсн гиичнриг йосндан өврүлв. Кезәңк авъясмудан батар хадһлҗ йовх таңһчд ирҗ, шаҗна үүлдврт орлцсндан ик байрта тедн хәрцхәв.
Күүндврин йовудт гевш Тензин Чойдак оюни ик туста үүлдвр күцәҗәхднь Катан Саврт ханлтан медүлв. Кезәнәс авн хурлмудт шаҗна евәлтә өдрлә дуулгдҗ йовсн айсмуд сергәгдҗ, мартгдсн көгҗмин зевсгүдиг улсин оньгт тусхаҗ, баһчуд нааддгиг дасхлһнд Хальмгин билг-эрдмин ачта үүлдәч күцәҗәх кергнь медүлҗәнә. Улсин болн үйнр хоорндк залһлдан тасрлго бәәхд эн керг туслҗана.
«Эн төсвин чинрнь йир ик, - гиҗ гевш Тензин Чойдак келнә. - Келн-улсин заяни цага авъясмудла әмтиг таньлдулсн деерән, оюни үүлдврт ик чинр зүүлһҗәсн мана өвкнр бурхндан нерәдсн авъясмуд сергәҗ, сойлын болн көгҗмин делгрлтд уралан ишкдл кегдҗәнә. Мөргүлмүдт умшгддг ном көгҗмд буулһгдҗ, әмтнд улм өөрхн болсиг тернь медүлҗәнә. Бурхна номиг заавр угаһар эврә зүркнә залмҗар дасх седкл тернь зүүлһҗәнә. Маднд күч өгәд, уралан көтлдг сәәхн авъясиг цааранднь делгрүлхмн. Тууҗиг, сойлыг, шаҗиг, өвкнрин цецн ухаг тодлулҗ, мадниг негдүлҗәдг эн авъясан батлхмн».
Катан Саврин келсәр, евәлтә тер өдр әмтнә оньгт тусхагдх көгҗмин көтлвр шинрүлгдҗ, соньн шин тоот немгдхмн. Даруһас эн керг-үүлдврт белдвр эклхмн.
УШКАНА Сувсн

Видео