«Делгрлтин күчн» шин җисә бүрдәв

Сегодня, 14:22 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр Элстд «Негдсн Әрәсә» партин гешүд тавн җилә көдлмшин аш дигләд, цаарандан кех-күцәх тоотын тускар цәәлһҗ келәд, шин зура батлв.
«Негдсн Әрәсә» партин Хальмг әңгин сегләтр, Хальмг Таңһчин Толһач Хаска Батун һардврт болсн ик хургт йосна элчнр, депутатнр, олна үүлдәчнр, таңһчин райодын партин гешүд орлцсн болдг.
Өргн сүүр секхләрн, Хаска Бату хамгин түрүнд «Негдсн Әрәсән» шин гешүдт итклтә цаасинь бәрүлҗ өгв. Тедн дунд цергә шишлң керг-үүлдврт орлцачнр заагдснь темдгтә болв.
– Бидн хамдан төрскн һазран босхчадг ниитә баг болвидн. Ода болхла хамцу үүлдврән олна кергин төлә зөрүлхвидн, – гиҗ Бату Сергеевич партин шин гешүдиг йөрәв. Тер мет таңһчин Толһач нег һазра күүкд улст нарт-делкән сән Өдрлә бүлән үгмүдән нерәдв.
Тер өдр өргн сүүр угтад партин гешүд олн төрмүдәр бүрдәгдсн талвңгудт көдлсн билә. Селәнә эдл-ахун, тосхлтын, сән таал тогталһна, эрүл-менд харлһна, сурһуль-эрдмин, зуульчллһ делгрүллһнә болн талдан төрмүд тенд босхгдв. Талвң болһна көдлмшт дааврта улс, дамшлтта мергҗлтнр, арһлачнр, селәдин толһачнр орлцад, эврәннь седвәрән орулсмн. Хөөнь энүг улсин көтлврт орхнь лавта болв.
Талвң болһна һардач үг авад, көдлмшин йовудт ямр шиидвр һарһсна тускар олнд соңсулв. Хальмгин залврин Ахлач Босхмҗин Гилән иргчдән кех-күцәх көдлмшт ирлцңгү дөңгән күргхән медүлв.
Хаска Батун темдглсәр, таңһчин улсиг үүмүлҗәдг төрмүдт һол оньган өгч, терүг хаһллһнд шунмһаһар орлцх зөвтә болна.
– Нег һазра улсан соңсад, төрмүдтнь орлцад, цааранднь зөрсндән күрх санатаһар көдлхвидн. Эн туст цуг таал бәәнә. Мел өмәрән зүткҗ, тәвсн зураһан хамдан күцәхвидн, – гиҗ Бату Сергеевич иткүлв.
Ик хургин йовудт таңһчин ачта улсин Хүүвин ахлач Пашнана Эрднь «Делгрлтин күчн» нертә промышленностиг делгрүллһиг дөңнҗәдг олна җисә бүрдәлһнә седвәр орулв. Энүнә цәәлһсәр, йосна, бизнесин болн олна үүлдәчнр эн җисәнә ханьд орад, ирлцңгү үүлдврән күцәҗ чадхмн. Шин җисәг таңһчин Улсин Хуралын (Парламентин) депутат Михаил Богатов һардҗ чадхмн, гиҗ Эрдне Лиджиевич ухан-тоолврарн хувалцв. Эн седвәриг цуһар дөңнәд, шин җисәнә һардачиг үүлднь батлв.
Михаил Богатов олн җилдән төрскн һазрин делгрлтин халхар көдлҗ йовна. «Мана таңһч аграрн-индустриальн регион болхар зүткчәнә, эн туст шин үүлдвр секәд, эдлврт орулад, көдлмшч ормс бүрдәхвидн. Шин җисәнә һардачд намаг батлснд байрлҗанав», гиҗ Михаил Александрович келв.
– Сүл җилмүдт мана таңһч делгрәд йовна, эннь ик, байн дамшлтта, төрскнч седклтә, дааврта улсин ач-тус мөн гиҗ темдглх кергтә. Күслдән күрч, дор ормдан зогслго цааранднь арһ-чидлән олзлад, олн-әмтнә җирһл ясрулхин төлә көдлхәр шунҗанавидн, – гиҗ Хаска Бату ашлв.
Ик хургин чилгчәр Хальмг Таңһчин улсин артист Мукөвүнә Кутлан олна дунд тааслт олсн «Сертн, сергцхәтн, хальмгуд» дуулҗ сергмҗ үүдәв.
КАРСАНА Евгения

Видео