Олн келн-улсиг негдүлхәр

Сегодня, 12:57 | Общество, Таңһчин зәңгс, Зіњг, Сойл

Одахн Элстд Санкт-Петербург балһснас нертә дууч Алиса Супронова ирәд, Хальмгин хәләһәчнриг билг-эрдмәрн байрлулв. Тодлулхд, Алиса мана таңһчд кесг дәкҗ ирҗәнә. Нидн хаврар эн бамб цецгин наадмд ирәд, кесг керг-үүлдврт орлцсн билә.
Концертин өмн Алиса Супронова «Калмыкия» РИА-н барин төвд седкүлчнрлә харһҗ күүндв.
Энүнә келсәр, Әрәсән Президентин зәрлгәр олн келн-улсин ниицлтин җил зарлгдснас иштә эн соньн төсв күцәҗәнә. Эн җилин йовудт нертә дууч орн-нутгин олн һазрар йовад, көгҗмин эв-арһар олн-әмтиг негдүлхәр зуралҗана. «Көгҗм мадниг негдүлх» гисн төсв күцәгдхмн. Улсин хоорндк көгҗмин наадмин хаалһнь ут болх гиҗ келх кергтә. Мел мана таңһчас эн эклснь темдгтә болв.
– «Көгҗм мадниг негдүлх» нертә төсв Әрәсән Президентин саңгин сойлын седвәрин дөңгәр күцәгдҗәнә. Хальмг Таңһчд экләд, хөөннь Бурять, Чеченск, Ингушск, Донецк болн Луганск Улсин Республикүдт одхв. Хальмгт дәкнәс ирсндән байрта бәәнәв, – гиҗ Алиса темдглв.
Баахн дуучин келсәр, орн-нутгин олн тәәз деер билгән үзүлҗ ниигмин сүлҗәнд олн-әмтнлә күүнднә. Алиса 40 һар келәр дуулна. Олн-әмтн терүгинь медәд, дуучла өөрхнәр таньлдхар седнә.
«Ямр чигн келәр ду дуулхар седхлә хамгин түрүнд цаһан толһа даснав. Үзг болһниг яһҗ чикәр келдгинь дасад, дарунь дууһан орчулнав. Терүнә ашт юуна тускар дуулҗахан сәәнәр медҗ авнав», - гиҗ эн хувалцв.
Әрәсән орн-нутг олна гер болна, тегәд бидн цуһар нег-негнәннь тууҗ, сойл, авг-бәрц медх болн күндлх зөвтәвидн. Темдглхәс, олнд темдгтә «Катюша» ду Алиса Супронова дөчн келәр дууҗ, энүнә нернь Әрәсән өөдән күцәврин дегтрт орв.
Элстд Алиса хойр өдр дарандан Манҗин Аркадин нертә филармоньд эврә үүдәсн олн ду болн Әрәсәд бәәдг олн келн-улсин келәр кесг ду бас дуулв. Хальмг келәр «Сертн, сергцхәтн, хальмгуд», «Ээҗин дун» болн «Катюша» дуд дуулснь һәәхмҗтә болв. Энүнлә хамдан мана таңһчин нертә коллективс болн артистнр бас эн концертд орлцв.
Орн-нутгар йовад, аштнь «Әрәсән келн-улсин дуд» нертә көгҗмин альбом һарһхар чигн эн зуралҗана.
ОЛЬДАН Цаһан

Видео