Баахн бүлмүд гер-бүүртә болх

Сегодня, 12:43 | Общество, Таңһчин зәңгс, Зіњг

Шидр Элст балһснд 27 баахн өрк гер-бүүрин шишлң цаас авв. «Баахн өрк-бүлмүдт дөң күрглһн» гидг шаңһа көтлврин йовудт хотл балһснд бәәдг 27 өрк-бүл гер-бүүрин таал ясруллһнд демин мөңг авв. Элст балһсна Хургин ахлач Максим Сорокин болн хотл балһсна һардврин толһачин дарук Дмитрий Довгополов баһчудыг йөрәһәд, хөв-кишг дурдв.
- Сән авъяст тохрсар, җилин эклцәр бидн баһ наста өрк-бүлмүдт гер-бүүрин таал ясруллһнд шишлң цаас бәрүлҗ өгнәвидн. Нидн 24 өрк көтлврт орцлсн болхла, эн җил теднә то өсв. Эн җил демин мөңгнә кемҗән 2 сай арслң тогтав. 2008 җиләс авн эн көтлврт 600 шаху өрк-бүл орлцв, эн кергт ут тоодан 15,5 сай арслң йилһгдв. Келхд, балһсна Хургин депутатнр болн һардвр эн төрт ик оньг тусхаҗ, демин мөңгнә кемҗә икдүллһиг нег дууһарн дөңннә. Би эврән олн үртә эцк болнав, тегәд өнр-өсклң өрк-бүлмүдин то өсчәх йовдл байрлулна. Эндр шишлң цаас авсн өрк-бүлмүд дунд нәәмнь олн үртә. Мана баһчуд төрскн һазртан гермүд тосхад, үрдән өскәд энд бәәх зөвтә. Тер цагт мана таңһч батрад, цецгәрәд бәәх, – гиҗ Максим Сорокин йөрәлин үгдән келв.
Дмитрий Довгополов бас баһчудыг эн байрта өдрлә йөрәв. Әрәсән Президент Владимир Путинә темдглсәр, өрк-бүлмүд бат болхла, мана орн-нутгин кен чигн диилҗ чадшго болна. Гер-бүүрин таал ясруллһнд өггдҗәдг демин мөңгн тана өрк-бүлмүдт туслҗ олн үр өскхд нилчән күргтхә гиҗ темдглв.
Эн өдр һурвн үртә Заяна Мускинан җирһлд байрта йовдл учрсиг күүкд күн заав. Эн урднь мөңг өгъәлҗ авад, гер хулдҗ авсмн. Хойр җил хооран бер белвсрәд, хойр күүкән болн көвүһән һанцарн өскчәнә. Баахн өрк-бүлмүдиг дөңнлһнә көтлврт арвн һурвн җил хооран орлцсн билә, болв зәрм бәрмт цаасн уга болад, эн хойрдад эрлһән орулад, ода шаңһас демин мөңг авснь тер. Эн мөңгәр олн үртә эк ипотекин зәрм хүвинь даңцахар шиидв. Хойр күүктә Татьяна Корниенко бас мөңг өгъәлҗ авад, патьр хулдҗ авсн билә. Шаңһас авсн 472 миңһн арслңгиг эн бас ипотекин даңцалһнд олзлх саната. Татьяна Хальмг Таңһчин Деед зарһд көдлнә, олна бәәдл-җирһлд шунмһаһар орлцна. Анастасия болн Таиса күүкднь экән дахад, билгтә болн седвәртә болҗ өсчәнә. Эднә өрк-бүл «Энтн мана өрк-бүлин авъяс» гидг Әрәсән марһанд хойр дәкҗ орлцсмн.
Гер-бүүрин таал ясруллһнд шаңһа дем авсн өрк-бүлмүдин нерн деерәс дөрвн үртә эцк Босхмҗин Виктор ханлтын үг келв. Герин эзн цергә шишлң керг-үүлдврт орлцад, залу-зөрмгән үзүлсмн. Баахн эк-эцк хойр Мазн, Дарина, Давид болн Баир үрдтән чик сурһмҗ өгхәр шунна. Эн өдр байрта болн ончта болв гиҗ олн үртә эцк темдгләд, дән-даҗг уга, цуһар ниитә бәәхиг дурдв.

ДООҖАН Наталья

Видео