Цергә-тууҗин ниицәнә үүлдврин тускар

Сегодня, 12:40 | Общество, Таңһчин зәңгс, Зіњг

Шидр «Калмыкия» РИА-н барин төвд Әрәсән цергә-тууҗин ниицәнә Хальмгин әңгин элчнр 2025 җилин аш диглҗ, эн җил кех-күцәх тоотын тускар цәәлһҗ келв.

Тодлхас, одахн Элст балһсна һардврин ахлачин дарук Дмитрий Довгополов РВИО-н Хальмгин әңгин һардачд батлгдв. Энүнә келсәр, ниицәнә көдлмшин йовудт гегәрүлгч, номин болн хәәврин төсвс күцәгдхмн, терүнәс нань тууҗин лавта йовдлмудын туст бас ик көдлмш кегдҗәнә. Күн болһн нег үлү дорас өсч йовх баһчуд эврә орн-нутгин тууҗиг сәәнәр медх зөвтә.
Нидн Алдр Диилврин 80 җилин өөнлә ирлцүлҗ, «Төрскән харсчадг Әрәсән улс» нертә Цугәрәсән номин хург болв. Терүнд Моңһлын, Кыргызстана, Беларусин, Арменя орн-нутгудын болн Әрәсән кесг регионмудын, тер тоод ДНР-ин, ЛНР-ин болн Запорожск мүҗин, элчнр бас орлцв, ут тоодан 120 һар күн цуглрв.
– Номин хургин йовудт Төрскән харсгч Алдр дәәнд мана орн-нутгин олн келн-улс орлцсна болн тууҗин лавта йовдлыг хадһллһна туск төрмүд босхгдв. Тер мет хальмг улсин элчнр Алдр Диилвр өөрдүллһнд ямр тәвцән орулсиг нертә номтнр Михаил Мягков болн Юрий Петров темдглсн билә, – гиҗ Хальмг номин Төвин һардач Кукана Виктория келв.
2025 җилин йовудт Элстин сурһуль-эрдмин бүрдәцст тууҗин халхар кесг кичәлмүд давулгдв. Дәкәд тодлхд, тууврин һашута җилмүдт әмнәсн хаһцсн хальмгудт «Родина» сойлын төвин өөр тәвгдсн санлын чолуг балһсна дорд үзгт бәәдг «Буйслһн болн босхмҗ» бумблвин өөр углҗ тәвсмн.
– Тууҗин нег йовдлд нерәдсн санлын тоот нег ормд бәәх зөвтә гиҗ шиидвр һарһгдсн билә, эннь мел чик йовдл, – гиҗ тууҗин номин доктор Очра Уташ темдглсн болдг.
Нидн Төрскән харсачин болн Алдр Диилврин ончта өөнд нерәдсн җилд чинртә олн керг-үүлдвр давулгдсн билә. Үлгүрлхд, хөн сарин 9-д Хальмг 110-ч онц дивизин дәәчнрин хувцта 80 күн мөр унад, Элст балһснд Диилврин 80 җилин өөнд нерәдсн парадт орлцснь темдгтә болв.
Хәәврин багмудын бүрдәцин көдлмшин тускар һардачнь Халхинә Дмитрий цәәлһҗ келв. – Мана бүрдәц РВИО-н Хальмгин әңглә өөрхн залһлда бәрҗ көдлнә. Давсн җилд хәәврин көдлмшин ашт Яшкулин района Хулхт селәнә эргндк һазрт олҗ авгдсн салдсмудын цогцин үлдл оршагдсн билә. Тер мет «Баатрмуд болн теднә туурмҗ» нертә һәәхүл бүрдәгдсмн, – гиҗ Дмитрий Владимирович темдглв.
Эн җилин һаха сард Хальмг номин Төв 85 җилин өөнән темдглхәр белдҗәнә. Энүнлә ирлцҗ, номин-дамшлтын ик хург болхмн. Терүнә йовудт тууҗин йовдлмудын үнн-чик тоот хадһллһна туст бас илдклмүд белдҗ, олнд соңсулхмн.
ОЛЬДАН Цаһан

Видео