Төрскән харсачнриг ачлв

Сегодня, 15:27 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Төрскән харсачин Өдрлә Элстд «Мөңк һал» санлын бумблвин өөр байрин керг-үүлдвр болв. Терүнд Хальмг Таңһчин Толһач Хаска Бату, Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлач Босхмҗин Гилән, Әрәсән Федерацин Хүүвин гешүн Байир Путеев, Төрскән харсгч Алдр дәәнә ветеран Петр Леонтьев, зөв-йос харлһна болн күцәгч йосна бүрдәцсин элчнр, Әрәсән Баатр Лиҗин Мингияна экнь Байрта Владимировна болн Әрәсән Баатр Очр-Һәрән Нарн, цергә шишлң керг-үүлдврин орлцачнр, бичкдүдин олна ниицәсин гешүд орлцв.
- Төрскән харсачин Өдр мана орн-нутгт һоллгч болн ик чинртә сән өдр гиҗ тоолгдна. Бидн төрскн һазр-усан харссн улсин зөрмгиг ик ханлттаһар тодлнавидн. Мана таңһчд Хулхт селәнә өөр Төрскән харсгч Алдр дәәнә цагт аврлт уга бәрлдән болсмн. 28-ч Әәрмин салдсмуд тенд болсн дәәлдәнд залу-зөрмг кевәр хортнла ноолдҗ, тедниг күүчәд, маднд сән-сәәхн җирһл белглсмн. Эндр мана байрин керг-үүлдврт ачта ветеран Петр Леонтьев орлцҗана. Петр Леонтьевич нидн намрар 100 җилин өөнән темдглв. Бидн мана ветеранар бахтҗ, өөрнь бәәҗ, үлгүр авнавидн. Эндр мана Хальмгин дәәчнр өвкнриннь кергиг цааранднь өөдәнәр күцәҗ йовна. Дәәнә һалд орсн цергчнр төрскн һазртан бәәһәд, энд көдлхнь маднд ик чинртә болна. Мана цергчнр олна бәәдл-җирһлд орлцна, дааврта үүлд көдлнә, эднд сән арһ өгдг көтлврмүдин гешүд болна. Хальмг Таңһч мана орн-нутгт күцәгдҗәдг «Баатрмудын цаг» гидг шаңһа көтлврт орлцад, «Баатрмуд 08» эврә көтлвр күцәҗәнә. Тегәд цергчнрин дамшлт таңһчин делгрлтд туслх. Цергә шишлң керг-үүлдврт орлцачнр олн зүсн керг-үүлдврт шунмһаһар орлцҗахнь байрта. Шидр цергчнр дунд болсн спартакиадт эдн зөрмгән, эв-дован болн арһ-чидлән үзүлв. Ода цергә даалһвран күцәҗ йовдг мана нег һазра цергчнрәр бидн бахмҗ кеҗәнәвидн. Бидн 110-ч Хальмг мөрн цергә онц дивизин зөрмгиг тодлнавидн, Басан Бадьминович Городовиковин, Эрдни Тюлюмджиевич Деликовин нерд мартшговидн. Өдгә цага баатрмуд Лиҗин Мингияна болн Очр-Һәрән Нарна зөрмгәр бахтнавидн. Үйнрин залһлдан мана таңһчин темдг мөн. Давсн җил мана орн-нутгт Төрскән харсачин җил билә, эн җил болхла Әрәсән Президентин шиидврәр улсин ниицлтин җил зарлгдв. Дәәчнрин зөрмг олн улсин ниицлтәс төрдг. Мана ниицлт энтн мана күчн. Төрскн һазран хадһлҗ, бичкдүдт Төрскндән дурта болхиг сурһх кергтә. Нег-негнәннь ээм түшҗ Хальмг Таңһчин цецгәрлтин болн Әрәсә оньдин алдр орн-нутг болхин төлә цугинь кех кергтә, - гиҗ Бату Сергеевич йөрәлин үгдән келв.
Төрскән харсачин Өдрлә залу-зөрмгән үзүлсн улс шаңһа ачлврар темдглгдв. Тиигәд, цергә сурһулин Төвин ах багш Увшан Виктор «Зөрмгин төлә» гидг медаляр ачлгдв. Цергә даалһвран үнн кевәр күцәһәд, зөрмгән һарһсн улст Советин Союзин Баатр Делгә Эрднин медаль бәрүлҗ өггдв. Әрәсән Баатр Очр-Һәрән Нарн эн ачлврар ачлгдад, цергә шишлң керг-үүлдвр эклснәс авн Төрскән харсачин Өдр фронтыг болн тылыг хамцулсна темдг болсиг темдгләд, Диилврин өдр өөрдүлхд тәвцән орулдг нег һазра улст ханлтан өргв.
Төрскән харсгч Алдр дәәнә ветеран Петр Леонтьев байрин хургт орлцачнриг Төрскән харсачин Өдрлә бас йөрәв. Дарунь цуһар мөңк һалд цецгә тәвв. Үдин хөөн Диилврин паркд байрин концерт болв. Цергә болн спортивн белдврин «Дәәч» төвин элчнр үүлдвриннь тускар хувалцв, таңһчин нертә артистнр болн бичкдүдин үүдәгч коллективс билг-эрдмән үзүлв.
ДООҖАН Наталья

Видео