Спортар соньмсдг көдләчнрин ниицән

Сегодня, 15:13 | Спорт, Таңһчин зәңгс, Зіњг

Шидр «Калмыкия» таңһчин зәңгллһнә бүрдәцин улд болсн харһлтд «Күч-көлснә көрң» гидг Әрәсән спортын ниицәнә Хальмг Таңһчд үүлддг әңгин гешүд үүлдвриннь тускар келҗ өгв. Таңһчд үүлддг бүрдәцсин көдләчнр «Бизнес-лига Элиста» гидг ниицә бүрдәһәд, хамдан олн зүсн спортын марһас давулдг болсмн. Ниицәнд нурһлҗ баһ наста улс орна, цуһар эдн спортар соньмсдг, чик авг-бәрц делгрүлҗәдг баһчуд мөн.
Санҗин Мергнә келсәр, нидн эдн мөчн сарас авн бар сар күртл мини-футболар, шатрар, бильярдар, теннисәр, бадминтонар болн талдан марһас бүрдәсн деерән өдгә цага лазер-таг наад давулсмн. Әрәсәд үүлддг «Күч-көлснә көрң» гидг олна ниицәнлә эдн залһлда бәрәд, таңһчд эврәннь әңг бүрдәхәр шиидв. Келхд, Әрәсән олна ниицән эднд марһас давуллһнд нөкд болв. Тер мет Хальмг Таңһчин спортын министерств болн спортын федерацс марһас давуллһнд дөң-тусан күргдгиг темдглҗ ханлтан өргв.
Харһлтд орлцсн Музгана Андрей, Очра Анатолий, Нусхан Валерий болн Бухан Гаврил күч-көлсч коллективс дунд спортын халхар марһас, олн зүсн наадд давуллһн үр-иньгин таал тогталһнд, нег-негән дөңнҗ ниитәһәр үүлдхд туслна гив. Ода таңһчд үүлддг әңгин ханьд 500 гешүн орна, теднәс ик зунь залу улс болна. Әрәсән олна ниицәнд 60 регион орна, эдн җил болһн сән гисн әңг шүүҗ авна. Хальмг әңгин гешүд иргчдән сән гисн һурвн региона тоод орх күслтә бәәнә.
БАТАН Сәәхлә

Видео