Цергә үүрмүдин өрк-бүлмүд харһв

Сегодня, 11:44 | Общество, Таңһчин зәңгс, Зіњг

Эн җил Әрәсән Президент Владимир Путинә зәрлгәс иштә мана орн-нутгт олн келн-улсин негдлтин җил гиҗ зарлгдв. Кезәнәс авн Әрәсәд олн келн-улсин элчнр хоорндан ахнр-дүүнр мет байр-зовлңган әдл хувалцад, кен-негән дөңнәд, ямр чигн цагт нег өрк-бүл мет ниитәһәр бәәдг. Одахн Элстд учрсн ончта йовдлын тускар эврәннь умшачнртан медүлҗәнәвидн.
Орсн 2026 шин җилин амрлһна өдрмүдт һурвн миңһн һар дууна хаалһ темцәд, Мурманск мүҗин Апатиты балһснас Ксения Епифанова һаһатаһан хамдан цергә шишлң керг-үүлдврин йовудт догшн дәәлдәнд энүнә Сергей авальта хамдан нег окопд әмнәсн хаһцсн хальмг командир Цеднә Баатрин өрк-бүлиг хәәһәд ирв. Тер юңгад гихлә Сергей Епифанов зәңг-зә уга геедрсн болҗ тоолгдҗана, зуг зарһин шиидврәр эн әмнәсн хаһцсн болв. Тегәд Ксения авалиннь цогциг оршалго, эндр күртл үкәрт одад, санлынь тевчдг арһ уга бәәнә. Эн учр деерәс Ксения Цеднә Баатрин һардврт Сергей Епифанов церглҗ йовсинь медәд, Элстд ирәд, хальмг дәәчин үкәрт күрәд, санлынь тевчәд, эк-эцкднь золһхар шиидв.
– Цеднә Баатрин тускар медәд, тер дарунь гилтә Хальмг Таңһчд күрхәр шиидләв. Элстд ирәд, патьр нәәмәдләд, энүнә эзн залу мини тууҗиг соңсад, нөкд болхар адһв. Маңһдуртнь балһсна үкәрт мадниг дахулад йовв. Зуг тенд Цеднә Баатр эс оршагдсинь медвидн. Дарунь мадниг Элстин вокзалд авч ирәд, тенд бәәрн таксистнр нөкд болв, – гиҗ Ксения Епифанова келврән эклв.
Таксистнр нег часин алднд Цеднә Баатрин эцк Олег Ильичин телефона тойгинь олв. Тер өдрин асхар Олег Ильич Ксенияд җиңнүләд, харһад таньлдв, маңһдуртнь болхла хамдан Ик Чонс селән тал һарч йовв. Тенд селәнә үкәрт Цеднә Баатр оршагдсн ормд ирәд, холас ирсн хойр күүкд күн цецгүд тәвәд, санлынь тевчв.
Цеднә Олегин келсәр, тиим холас ирсн улс мана өрк-бүлиг хәәҗәнә гисн зәңг мадниг өврүлв. Зуг хөөннь гиичнрлә таньлдад, мана салдсмудын тууҗ хойр өрк-бүлиг өөрдхсн ончта йовдл болснь тер.
– Бичкнәсн авн Баатр көвүм даңгин нүүрләчнрин тоод йовдмн. Цергә шишлң керг-үүлдврин йовудт болхла бас түрүн зергләнд йовла. Зөргтә командир цергә үүрмүдтән даңгин нөкд болдг билә, – гиҗ Олег Ильич көвүһән тодлҗ келв.
Темдглхд, Цеднә Олег долан дәкҗ СВО-н һазрт одад, буйнч аца күргв. 2024 җилин намрар энүнд «Салдсин эцк» гидг медаль бәрүлҗ өггдв.
Иим кевәр нег-негнәсн ик холд бәәдг хойр дәәчин өрк-бүлмүд таньлдад, элгн-садн мет өөрхн улс болв. Хаврт хальмг теегт бамб цецгүд цецгәрдгин тускар келәд, Цеденовихн күндтә гиичнрт мөрн сард дәкәд гиичд иртн гиҗ үрвр кев.
Ксения Епифанова мана таңһчд цаһан седклтә, тевчңгү, һольшг улс бәәхиг темдглв. Авалиннь цергә командирин эк-эцклә харһад, тәвсн күслдән күрәд, кергән күцәһәд седкл санамр гертән хәрв.
ОЛЬДАН Цаһан

Видео