Остап Бендерин бумб шатрин балһсиг кеерүлв

Сегодня, 13:29 | Общество, Таңһчин зәңгс, Зіњг

Шидр Элстд Сити-чесст шатрин бәәшңгин талвңд Остап Бендерин көшә байрин бәәдлд секгдв. Урднь Анацкийин нертә проспектд бәәсн бумб хуучрад эвдгдснә ашт Хальмг Таңһчин Толһач Хаска Батун седвәрәр терүг күрл олзлад шинәс цутхх шиидвр авгдсн билә. Билгтә дүрсләч Николай Жуков шин көшә кесмн. Бумб секлһнә керг-үүлдврт Элст балһсна һардврин толһач Лиҗикә Алдр, энүнә дарукс Довгопола Дмитрий болн Хаска Сергей, шатрин сурһулин һардач Утнасна Александр орлцв.
Шин көшәг баһчудын олн халхин төв бәәршлҗәдг бәәшңгин өмн углҗ тәвв. Бумбиг эргүлҗ арвн хойр сандл болн ширә тәвгдв, талвңгин эргндк һазрт олн зүсн модд урһҗана, тегәд теднә сүүдрт шатр наадхд таалта болхмн. Бумбиг эн ормд углҗ тәвх шиидвр авснь хара биш, эн бәәшңд 1998 җилд нарт-делкән шатрин Олимпиад болсмн. Ода шатрин бәәшңд ясвр кегдҗәнә, энд баһчудын олн халхин төв үүлддг болхмн, тегәд баһ наста улс бумбин өөр бас цаган тустаһар давулад, сергмҗтәһәр амрч чадхмн.
- Шин көшә секгдснь мана балһсна төлә ончта йовдл болҗана. Ода эн көшә олн җилдән мана күүкдиг, ачнр-зеенриг бәәтхә, дарук үйнриг чигн байрлултха, – гиҗ Алдр Васильевич темдглв.
Хальмг улс ик кезәнәс авн шатрар соньмсад эн нааднд йир дурта болдгиг Хаска Сергей темдгләд, эн бумб шатрин олимпиадын темдг болсн деерән шатр Элстин болн таңһчин төлә ик чинр зүүҗәхиг иткүлҗәнә гив. Утнасна Александр бас олн зүсн марһаст нертә шатрчнрла харһсн цагт Остап Бендер яһҗ бәәнә гиҗ соньмсдгин тускар келв. Шаҗна нарт-делкән ик хургин йовудт болх шатрин марһанд орлцачнр нааран ирҗ эрк биш шин бумб һәәххмн.
- Бумб болһн эврә тууҗта болдг. Нааран ирсн әмтн Остап Бендерин мөрнә темдгтһар күрч, әрүн санань күцхин тускар ухалтха. Эн авъяс батрад, эн бумбла залһлдата болтха, – гиҗ хотл балһсна һардврин толһачин дарук Довгопола Дмитрий седвәр татад йөрәв.

ДООҖАН Наталья

Видео