Дөңгән Курскд күргәд ирв

Сегодня, 10:00 | Происшествия, Таңһчин зәңгс, Зіњг, Эдн Төрскән харсла

Одахн таңһчин волонтермуд болн СВО-н ветеранмудын таңһчин негдлтин ахлач Чумда Николай Курскин мүҗд күрәд ирв, цергә шишлң керг-үүлдврт орлцҗадг теңгсин йовһн цергин 810-ч тойгта багин дәәчнрт буйнч седклин дөңгән бәрүлҗ өгв. Эн керг-үүлдврин тускар Николай Санджи-Горяевич маднд келҗ өгв.

«Эн багин дәәчнр цергә өөдән белдврән үзүлҗәнә. Ода эдн Курск мүҗд бәәршлҗәнә, түүнә сулдхврт залу-зөргтәһәр әмән әрвллго орлцв, күслдән күрәд, хортна цергиг Әрәсән һазрас көөҗ һарһв. Тиигсн бийнь хортн дару-дарунь хәрү дәврхәр седнә. Зөргтә хальмг дәәчнр цергә үүлдврт шунмһа кевәр орлцв. Суман онц темдгләд, деерәснь «Хальмг Таңһчас халун мендән илгәҗәнәвидн!» гиҗ бичләвидн»,-гиҗ Николай Санджи-Гаряевич сүл йовлһна тускар келҗ өгв.
Тиим кевәр мана хальмг дәәчнр Курск мүҗиг хортнас харсв. Тиим үүлдвр күцәхин төлә цергә дамшлт кергтә. Хальмг дәәчнр СВО-н йовудт кесг бәәр эзлҗ авад, хортна то баһрулад, хамгин шин зер-зев, техник олзлад бәәв. Хальмг Таңһчин улсас ирсн илгәвр сурһульчнрин бичгүд дәәчнриг кезә чигн байрлулна.
СВО-н ветеран Чумда Николай кесг дәкҗ буйнч седклин дөң күргсмн. Мана хальмг цергчнр кезә чигн таңһчин әмтнд ханлтан өргнә. «Диилвр өөрдҗ йовна, тадн эврә дөңгәрн терүг бас өөрдхәд бәәнәт»,- гиҗ мана дәәчнр Чумда Николайд болн түүнлә хамдан йовсн волонтермудт келнә.
СВО-н ветеранмудын негдлтин һардачла хамдан Комсомольский селәнд бәәдг Дорҗин Айс бас мана дәәчнр тал йовла. Дәәлдән болҗадг һазрур йовхасн Айс әәсн уга. Эврән чигн дөңгән авч одв. Тиим кевәр эгл улс бас чидлән хамцулад, мана хальмг дәәчнрт кезә чигн дөңгән күргхдән белн бәәнә. Нөкд болдг күн дала. «Эднд цугтаднь ик ханлтан өргхәр седләв, яһад гихлә эднә буйнч седкл омг үүдәҗ мана көвүдин залу-зөргинь холванд икдүлнә, цергә шишлң керг-үүлдврин йовудт кезә чигн урмд өгнә», - гиҗ Николай Санджи-Горяевич ханлтан өргнә.
«Бидн теңгсин йовһн цергин 382-ч тойгта батальона дәәчнр Чумда Николайд болн Дорҗин Айст, Хальмг Таңһчин цуг улст ханлтан өргхәр седләвидн. Эдн маднд дәәнд кергтә кергслмүд илгәв, тана дөңнлт маднд кезә чигн урмд өгнә. Бидн эрк биш Диилвр бәрхвидн!» - гиҗ баһ наста, болв дамшлтта, зөргтә хальмг дәәчнр бичг бичв.
СВО-н ветеранмудын, волонтермудын болн таңһчин улсин буйнч седклтә дөң Диилврин өдриг өөрдүлхнь лавта. Цуг мана дәәчнрт бат эрүл-менд, цергә ик күцәмҗ дурдҗанавидн. Диилврән бәрҗ, байрта-бахтаһар хәрҗ иртн гиҗ мөрәдҗәнәвидн.

ТҮРВӘН Һуна

Видео