Бурхн Багшин ном – мана җирһлд

Сегодня, 13:14 | Общество, Таңһчин зәңгс, Зіњг, Бурхн-шаҗна төрәр

Таңһчин җирһлд зөвтә орман олҗ, удан цагт тодлгдх Ярне шаҗна йосрхл күцәмҗтәһәр төгсв. Зун җилин туршарт кегдлго бәәсн шаҗна йосрхл Хальмгин Төв хурлд түрүн болҗ эн зунар күцәгдв. Хальмгин гелңгүд 45 хонгтан ном умшҗ Ярне йосхрлд бәәв. Энүнә йовудт гелңгүд Бурхн Багшин ном сергәҗ, шинәс умшҗ, тер номин цәәлһвр өглһнд килмҗән һарһҗ зальврв. Тиигәд цуг әмтә тоотд туслх буйнта үүлдвр күцәлһнд олзлгдх медрлән эдн улм гүүдүлв.

Ярне йосрхл төгсхин өмн Гагье ик мөргүл болсмн. Энүнә йовудт керг-үүлин харшлтыг уга кеҗ, учрсн му тоотас цеврлҗ, оюни делгрлтин төлә сән таал тогталһнд туслх ном умшгдсмн.
Урднь эс күцәгдҗәсн шаҗна йосрхл күцәһәд, хальмг һазрт шаҗна авъясмудыг сергәҗ, бәәдл-җирһлд тохралһнд туслв. Бурхн Багшин номиг олн дунд өргнәр тархалһнд чигн эннь ик нилчән күргхмн.
Хальмгин Шаҗн Лам гевш Тензин Чойдакин келсәр, Ярне, Гагье болн Соджонг һурвн йосрхл хурлмудт кезәнәс авн тогтсн җирһлин ул-сүүр болҗана. Тедниг шинәс босхч күцәснь – энтн хуучна авъясмудыг сергәсн деерән Бурхн Багшин ном эндрк улсин җирһлд урмд өгчәх, өдр-бүрин үүлдвртнь оюни һардвр болҗах номин чинринь медүлҗәнә.
«Хальмгин һазрт Бурхн Багшин ном җирһлин салшго нег әңгнь болҗана, гиҗ эн кемәс авн хальмг күн болһн итклтәһәр келҗ чадхмн. Энтн ик байрта йовдл болҗана», - гиҗ Хальмгин Шаҗн Лам гевш Тензин Чойдак иткүлҗ келв.
Зуни цагт болсн шаҗна ик чинртә эн йосрхл олн хальмгудын нилчәр, Әрәсәд болн талдан һазрт бәәдг хальмгудын бәрцин дөңгәр кегдсмн. Шаҗна эн йосрхл яһҗ давсна тускар Шаҗн Лам келҗ өгв. «Эн йосрхлын йовудт бидн өдр болһн өрүн-асхни мөргүлмүд кеҗ, хальмг улсин нерн деерәс Бурхн Багшин хәәрлсн ном умшҗ мөргләвидн. Мана хальмгуд альд йовв чигн амулң-менд йовтха гиҗ тасрхан уга зальврҗ мөргсн биләвидн. Хөв-кишгән олҗ, күн болһн эрүл-менд бәәтхә, цуг әмтә-киитә тоотд тусан күргҗ йовтха, Бурхн Багшин хаалһар уралан зөртхә!» - гиҗ гелңгүд дурдсн болдг.
Бурхн Багшин ном мана эндрк җирһлд улм батрҗахиг шаҗна эн йосрхл медүлҗәнә.

УШКАНА Сувсн

Видео