Лаганя эмнлһн ясгдх

Сегодня, 11:25 | Общество, Таңһчин зәңгс, Зіњг, Эрўл-менд харлһн

Шидр Хальмг Таңһчин эрүл-менд харлһна министрин үүл дааҗадг Мушаран Арслң Лаганя районд керг-төрин халхар одв. Района эмнлһнә ах эмч Шарапа Николай энүнд эмнлһнә әңгүдин үүлдвр яһҗ бүрдәгдсиг цәәлһәд, энд олзлгдҗадг кергсл үзүлв.
2027 җилд района эмнлһнд бат ясврин көдлмш эклхмн, 2028 җилд болхла күүкд улст дөң күрглһнә әңг тосхгдх болв. Тер мет района эрүл-менд харлһна делгрлтин йовудт эмнлһнд өөдән чинртә дөң күрглһнә эв-арһс өргҗүллһнә болн таңһчин эмнлһс хоорндан дамшлтарн хувалцлһна көдлмш давулгдхмн гиҗ зуралгдҗана. Шарапа Николай гиичд УЗИ, КТ шинҗллт кедг кергслмүд, месллһнә болн бачм дөң күрглһнә әңгүд үзүлҗ тодрха цәәлһвр өгв.
Мушаран Арслң Лаганя района эмнлһнд ирсн кемдән месллһнә әңгин һардач Манҗин Санлыг «Хальмг Таңһчин ачта эмч» нер зүүснләнь йөрәһәд, өөдән ачлвринь бәрүлҗ өгв. Санл Санджиевич таңһчин эрүл-менд харлһна халхд олн җилдән көдләд, ик ач-тусан күргсмн. 2011 җилд Манҗин Санл Шарапа Николай хойр шарх-шав авсн кемд дөң күрглһнә шишлң цергллт бүрдәсн болдг. Терүнә ашт түргн дөң күрглһнә чинр өөдлв, әмнәсн хаһцсн улсин то баһрв. Манҗин Санл Донецк Улсин Республикд болн Белгородск мүҗд эврә сән дурар эмчәр көдлсмн. Тер мет эн «БАРС-БПЛА» багин ханьд цергә шишлң керг-үүлдврт орлцад, цергә госпитальмудт эмнлһнд бәәсн дәәчнрт болн бәәрн улст дөңгән күргсмн.
БАТАН Сәәхлә

Видео