Санҗин Николайин җирһлин җивр

Сегодня, 12:25 | Общество, Таңһчин зәңгс, Зіњг, Сойл

[b]Хальмг Таңһчин йосна, сойлын болн олна үүлдәч, шүлгч, номт Санҗин Николайин 70 җилин өөнд нерәдсн керг-үүлдврмүд таңһчд давв. Билгтә үрнә неринь мөңкрүллһнд нерәдсн байрин хургудт болн харһлтст олн күн орлцв. [/b]
Эн җилин һаха сарин 11-д А. Амр-Санана нертә Келн-улсин дегтрин саң таңһчин сойлын болн зуульчллһна министерствин дөңгәр Санҗин Николайин үүдәврмүдин умшлһ бүрдәв.
[bЭнүнә шүлгүдин дүүрән[/b]
Санҗин Николай бичкдүдт нерәдсн шүлгүдин арвн хойр хураңһу барлҗ һарһсмн. Терүнәс нань Николай Джамбулович номин шинҗллт кеһәд, хойр монографь бичсн болдг. Олн җилин туршарт билгтә эн үүлдәчин үүлдвр таңһчин сойлын җирһлиг уралан йовулхд урмд өгч йовсмн.
Санҗин Николайин шүлгләнә байрт орлцхар Әрәсән бичәчнрин ниицәнә Сарпулин әңгин ахлач Александр Куприн, Әәдрхнә бичәчнрин ниицәнә ахлач Юрий Щербаков, Әәдрхнә типографин һардач Роман Сорокин болн талдан улс ирв. Сойлын көдләчнр, бичәчнр, үүрмүднь, Санҗин Николайин үүдәврмүдиг меддг умшачнр байрин харһлтд орлцв.
Шүлгләнә байриг сексн йөрәлин үгдән таңһчин сойлын болн зуульчллһна министр Бембин Евгений йосна болн олна үүлдәч, нертә бичәч Санҗин Николайин 70 җилин өөн өргнәр темдглгдҗәхин тускар келв. Олн җилдән сойлын министерств, бичәчнрин ниицә һардад, «Байр» седкүл бүрдәһәд, Николай Джамбулович таңһчд ик ач-тусан күргв.
Олн җилдән үүрлҗ йовсн Юрий Щербаковин келсәр, эдн баһ настадан таньлдҗ үүрлсмн. «Николай мини шүлгүдиг, тиигхд экләд бичҗәсн цагт, Хальмгин баһчудын газетд, хөөннь «Байр» седкүлд барлсн билә. Бичәчнрин олн керг-үүлдврт орлцҗ йовлавидн. Үүдәгч кесг төсвс күцәсн йовдлмуд мартгдхш. Хальмгин бичәч Балакан Алексейин төрскн һазр Әәдрхнә мүҗин Буруны (Барун) селән мөн. Николай Джамбулович Хальмгин болн Әәдрхнә һардврин дөңгәр Балакан Алексейин нертә утх-зокъялын мөрә бүрдәхин туск седвәр орулсн билә. Үүриннь шүлгүдиг орс келнд орчулад, дегтрмүд барллавидн», – гиҗ Юрий Щербаков тодлв. Санҗин Николайин шүлгүдин дәкн нег дегтриг Щербаков авч ирәд, Келн-улсин дегтрин саңд белглв. Эн дегтрт орсн зәрм шүлгүдиг Юрий Щербаков умшҗ өгв. Көглтин Даван болн Расул Гамзатовин иньгллтд нерәдсн шүлг цуглрсн улсин седкл авлв.
Эн өдрмүдт Юрий Щербаков бас 70 насна өөнән темдглҗәхинь күндләд, Келн-улсин дегтрин саңгин нерн деерәс хальмгудын авъясар захта болн ханцта киилг-өмскүл энүнд өггдв.
А. Амр-Санана нертә Келн-улсин дегтрин саңгин һардач Майя Безидееван темдглсәр, министрәр көдлҗәхдән Санҗин Николай дегтрин саңгин көдләчнрин туст килмҗ һарһҗ йовсмн. Николай Джамбулович бичәчнрин дегтрмүд барллһнд, тер дегтрин саңгин көрң байҗуллһнд оньган тусхаҗ йовла.
Әрәсән бичәчнрин ниицәнә Хальмг әңгин һардач Бадака Татьяна, бичәч Чонгона Василий тодлврарн бас хувалцв. Санҗин Николайин шүлгүдиг сурһульчнр болн оютнр умшв.
[b] Билгтә үүлдәчин нерн мөңкрүлгдв[/b]
Хальмг Таңһчин сойлын делгрлтд ик ач-тусан күргсн йосна болн олна үүлдәчин, Әрәсән Федерацин, Хальмгин болн Моңһлын сойлын ачта үүлдәчин нерн таңһчин сойлын делгрлтин болн улсин билг-эрдмин Төвд зүүлһгдв. Элстд дүңгәҗ боссн эн герт Николай Джамбуловичин үүлдврт нерәдсн байр болв, энүнд элгн-саднь, хамдан сурһуль сурч йовсн, хамдан көдлҗ йовсн үүрмүднь цуглрҗ ирв.
Сойлын делгрлтд насн-җирһлән нерәдсн үүлдәч-бичәчд нерәдҗ, энүнә нер зүүсн сойлын Төвд Санҗин Николайин бумб босхгдв, хальмг улсин билгтә үрнә намтрла болн үүлдврлә таньлдулҗадг музей секгдв.
Өөнин байрт орлцхар ирсн әмтн Санҗин Николайин бәәдл-җирһлин болн үүлдврин туск һәәхүл хәләв. Энд Николай Джамбуловичин бичсн үүдәврмүд, зургуд, бәрмт цаасн болн нань чигн тоот олна оньгт тусхагдв.
Хальмг Таңһчин сойлын җирһлд Николай Джамбуловичин ач-тусин тускар таңһчин сойлын болн зуульчллһна министр Бембин Евгений өөнин хургиг секчәһәд келв. Эврә һазр-усна тускар үүдәврмүдтән бичҗ мөңкрүлсн деерән Әрәсән ик нутгт зөвтә орман олҗ, өмн үзгин меҗәһинь бат кевәр харсч зогссн хальмг нутган билгтә бичәч делкәд туурулсмн. Таңһчин сойлын делгрлтд ик йовуд өгч, үүдәгч коллективс бүрдәҗ, орн-нутгар, һазадын нутгудар йовҗ хальмг билг-эрдмән өргнәр үзүлхд эн шунҗ орлцсн болдг. Келн-улсин хоорндк залһлдаг батллһнд, моңһл келтнрлә, хам-хоша бәәдг һазрин сойлын көдләчнрлә болн бичәчнрлә залһлда бәрҗ үүлдсинь темдглхмн.
«Эн герин үүлдврин дөңгәр хальмг билг-эрдм хадһлгдҗ делгрҗәнә. «Тюльпанчик» бичкдүдин бииһин ансамбль энд бәәршлҗәнә. Тод үзг дасчадг сурһульчнр энд кезәңк бичлтлә таньлдҗана. Райодын улсин коллективс ирҗ энд билг-эрдмән үзүлҗәнә. Зурһан района сойлын эрдмчнрлә хотл балһсна әмтн таньлдв. Дәкн зурһан района коллективс җилин чилгч күртл энд билгән үзүлх болв. Николай Джамбуловичин кергнь цаарандан тиигәд делгрҗ йовна. Шин олн билгтнр өсч, таңһчан туурулхнь маһд уга», – гиҗ Евгений Владимирович иткүлв.

[b] Үүрмүдин тодлвр дүринь герлткв [/b]
Билгтә бичәч болн чадмг һардач болҗ таңһчдан үнлгддг бәәсн Николай Джамбулович җирһлин хаалһдан олн үүрмүдтә болсмн. Теднә тодлврмуд билгтин дүриг улм герлтксн болв.
Таңһчин сойлын нертә үүлдәч, Хальмгин Баатр Нәдвдә Петр энүнә кеҗ-күцәсн тоотын туск тодлврарн хувалцв. Шүлгч болн багш Канкан Эрднь Санҗин Николайд нерәдсн шүлгән умшв. Хальмг ик сурһульд хамдан сурһуль сурсн Санҗин Сергей Николай Джамбуловичин намтриг тодлад, баһчудыг хамцулҗ чаддгинь медүлв. Комсомолын халхар шунҗ үүлдәд, оютнрин тосхлтын багмуд толһалад, Санҗин Николай седвәртәһәр көдләд, ачлгдсинь чигн эн тодлв. Сойлын, барин, урн үгин үүдәлтин халхар Николай Джамбуловичин күцәсн тоот төрүц мартгдшго, гиҗ эн иткүлв.
Өөнин хургин хөөн байрин ик концерт болв. Энүг чадмгар давулсн хальмг улсин артистк Тепкин Вера таңһчин сойлын делгрлтин болн улсин билг-эрдмин Төвд йосна болн олна үүлдәч, бичәч Санҗин Николайин нерн зүүлһгдҗәхин туск Хальмг Таңһчин Толһач Хаска Батун зәрлгиг олнд соңсхч умшв.
Хальмгудын бәәтхә, цуг моңһл келтнрин частр болсн «Менд, менд!» гидг дун концертин эклцәр күңкнв. Санҗин Николайин шүлг олзлад, Манҗин Аркадь бичсн дун кен-негнднь таасгддгнь маһд уга.
Сергмҗтә айсмуд күңкнв
Таңһчин нер һарсн коллективс «Өөрднр» бииһин театр, «Бамб цецг» дууна болн бииһин ансамбль, «Тюльпанчик» бичкдүдин бииһин ансамбль концертд орлцв. Мана нертә дуучнр Очкан Анна, Чиктән Татьяна, Татьяна Бузылева дуулсн дуд Санҗин Николайин шүлгүд көгҗмлә сәәнәр таарсинь тодлулв. Ут тоодан дөчн һар шүлгнь дуунд хүврәд, дуулгдҗ йовна. Цуг Әрәсәд нер һарсн артист, билгтә домбрч Шоврһа Арслңгин цоксн айсмуд төрскн теегин у-өргн бәәдлиг сергәҗ, хальмг күн болһна зүркнд өөрхн айсмудар делкәг дүүргсн болҗ медгдв. Санҗин Николайин шүлгәр бурят көгҗмч Ю. Эрдынеев бичсн ду Хальмгин нертә дууч Мерген Ким өргҗ дуулв.
Төрскн һазртан цань уга итклтә үрнә частр цуглрсн улсин йоста өргмҗ болв. Хальмгин билгтә үрн Санҗин Николайин 70 җилин өөнд нерәдҗ, санлынь тевчсн керг-үүлдврмүд тоолврта болн ухата һардачин, билгтә бичәчин үүлдвриг тодлҗ, кесн ач-тусинь темдглх арһ учрав. Санҗин Николайин нерн болн үүлдвр эндрк сойлын җирһлд цааранднь делгрәд, соньн төсвс күцәлһнд ик урмдта болҗана.
ХӨӨЧИН Галина

Видео