Орн-нутгиг хамцуллһна керг күцәҗ

Сегодня, 14:19 | Общество, Таңһчин зәңгс, Зіњг

Эн җил түрүн болҗ Әрәсән улсин келнә Өдр һаха сарин 8-д темдглгдҗәнә. Әрәсән Президент Владимир Путин 2025 җилин үкр сарин 4-д эн сән Өдрин туск зәрлг батлв. Орн-нутгин олн улсин төрскн кел хадһлхин, тедниг дөңнхин төлә эн өдр тогтагдв гиҗ зәрлгт келгдҗәнә. Әрәсән олн улсин ниицлтин җилд эн өдр темдглгдҗәхнь нег үлү ик чинртә болҗана.
Яһад гихлә эн байрин өдр кесг келн-улсиг хамцулҗ теднә кел, сойл делгрүлҗ, тууҗин туск шинҗллтиг өргҗүллһнд туслхмн. Цуг келн-улс кен-негән күндлҗ ниитә бәәлһнә кергиг эн батрулҗана, кесг келн-улсин сойлын ик зөөриг олнд өргнәр медүлҗәнә. Терүнә ашт бүклдән орн-нутгин күчн цань угаһар батрҗана, яһад гихлә келн-улс болһн талдан улсин сойлын зөөр-кел күндлнә, тернь орн-нутгин ниитә бәәлһнә бат улнь болҗ кесг келн-улсин иньгллтиг батрулна.
Эн өдриг Дагестана нертә шүлгч Расул Гамзатовин һарсн өдрлә темдглҗәнә, эн бичәч эврә үүдәврмүдән төрскн келәр болн орс келәр бичҗәлә. Әрәсән кесг олн улсин сойлын хамцу бәәдлиг медүлҗ, келн-улсин хоорндк хәрлцә цааранднь делгрүллһнә бачм кергин тускар терүнә үүдәлт медүлҗәнә.Әрәсәд ода зун тәвн шаху келн бәәнә.
Эн өдр мана орн-нутгин регионмудт, тер тоод Хальмг Таңһчд олна кесг керг-үүлдвр, концертс, улсин үүдәлтин һәәхүлмүд болхмн. Сурһуль-эрдмин бүрдәцст, дегтрин саңгудт марһас, кичәлмүд бүрдәгдх. Тиим керг-үүлдвр сойлын болн келнә зөөр хадһллһнд болн цааранднь делгрүллһнд туслх зөвтә. Хальмг Таңһчин медәтә болн уйн наста җаңһрчнр болн келмрчнр, кезәңк ут ду дуулдг дуучнр, домбрчнр билг-эрдмән үзүлхнь лавта.
1930-ч җилмүдт таңһчин билг- эрдмчнрин марһас райодар, дәкәд Элстд болдг бәәсмн, тер авъясиг ода сергәҗәнә. Өвкнрин алдр зөөриг хадһлад, дорас өсч йовдг баһ үйнрт медүлх кергтә. Эн өдр орн-нутгин цуг улсиг хамцулҗ, сойлын зөөриг олнд улм өргнәр медүлҗ, мана төрскн келнә чинринь өөдлүлхнь маһд уга.
ТҮРВӘН Һуна

Видео