Диктант бичхмн

Вчера, 12:58 | Общество, Таңһчин зәңгс, Зіњг

Хальмг Таңһчин сурһуль-эрдмин болн номин министр Александр Ким болн хальмг кел делгрүллһнә төвин һардачин үүл дааҗадг Мутан Елена шидр седкүлчнрлә харһад, Әрәсән улсин келнә Өдрлә болх керг-үүлдврин тускар келв.
- Һаха сарин 8-д, Әрәсән улсин келнә Өдрлә, мана орн-нутгт «Әрәсә – улсин гер» гидг диктант бичхмн. Әрәсән Президент давсн җилин намрар Әрәсән улсин келнә Өдриг темдглхин туст зәрлг батлсн билә. Эн өдр шүүҗ авснь хара биш, Дагестана улсин шүлгч Расул Гамзатов эн өдр һарсмн, эн өдр билгтин үүдәврин тасрхаг 21 келәр бичхмн. Мана таңһч эн керг-үүлдврт бас орлцхмн, - гиҗ Александр Ким зәңглв.
Мутан Еленан келсәр, Элстд һурвн талвң бүрдәгдх болв. Тиигәд, Б.Б.Городовиковин нертә Хальмг ик сурһульд 10 часла, Амр-Санана нертә Келн-улсин дегтрин саңд 12 часла болн баһчудын Герт 15 часла диктант эклхмн. Ода деерән төвин мергҗлтнр Расул Гамзатовин үүдәврин тасрха хальмг келнд орчулҗ белдв. Диктант бичсн күн болһнд хөөннь иткл цаасн бәрүлҗ өггдх болв.
БАТАН Сәәхлә

Видео