Кирһлһнә кем давҗана

Сегодня, 16:47 | Общество, Таңһчин зәңгс, Зіњг

Малчнрин төлә зуни кем дааврта болн чинртә болдг, тер юңгад гихлә хаврин цагт сән төл авад, малын то икдүләд, хөн сарин чилгчәр болхла хөөдән кирһлһнә дарани кем эклнә. Мана таңһч орн-нутгт торһн ноос кеҗ һарһдг зурһан региона тоод орна.

Шидр Хальмг Таңһчин селәнә эдл-ахун министр Гаван Тимур Хар Һазра района муниципальн бүрдәцин толһач Болдра Валерийла хамдан «Первомайский» СПК-д одад, хөд кирһлһнә кем яһҗ давҗахинь бүрткв.
Эндр тенд өдр болһн 50 шаху күн көдлнә. Тедн дунд кирһәчнр, ноос баглдг улс, тоочнр болн талдан мергҗлтнр мөн. Эн эдл-аху таңһчин нүүрләчнрин тоод ордгинь заах кергтә. Тохма мал өсксн деерән энд торһн ноос кирһҗ авна. Давсн җилмүдин то-дигәр 150 тонн ноосн кирһҗ авгдв.
Гаван Тимурин келсәр, эн җил торһн ноос эд-бод келһнд шаңһа демин кемҗән һурвн холванд өсв. Эдл-ахун көдлмшлә өөрхнәр таньлдад, тенд баһчуд олар көдлҗәхиг министр темдглв. «Первомайский» СПК-д дамшлтта көдләчнр баһчудт цугинь зааҗ, кергән даавртаһар күцәҗәнә гив.
ОЛЬДАН Цаһан

Видео