Зуульчллһн әмтиг хамцулна

Сегодня, 13:59 | Общество, Таңһчин зәңгс, Зіњг, Сойл

Москвад мөчн сарин 10-ас авн 14 күртл зуульчллһна хург ик күцәмҗтәһәр давв. «Зуульчлый!» гиҗ нерәдгдсн нарт-делкән хург ВДНХ-д болснь чинртә. Эн керг-үүлдвр Әрәсән улсин ниицлтин җилд нерәдгдв.
Әрәсәлә нөкцҗ үүлддг нутгудын шинҗләчнр, арһлачнр, нань чигн үүлдәчнр зурһадгч кемдән болсн эн ик цуглранд орлцв. Әрәсән зуульчллһна халхд эн керг-үүлдвр ик чинр зүүҗәнә.
Орн-нутгин цуг регионмуд энд эврә күцәмҗән үзүлнә. «Зуульчлый!» гидг VI нарт-делкән зуульчллһна хургт Хальмг Таңһчин сойлын болн зуульчллһна министр Бембин Евгений орлцв.
«Олн-зүсн сойл – хамцу зөөр:. зуульчллһн мадниг негдүлҗәнә» гидг нертәһәр давсн ик цуглранд Хальмгин зуульчллһна халх зөвтә орман эзлв.
Хальмгин бәәрн олн улсиг цуглулв. Хальмг Таңһч энд әмтнә оньг авлсн соньн көтлвр белдҗ үзүлв. Хальмг улсин сойлын зөөрлә болн авъясмудла зуульчнр таньлдв.
«Үрс Сар» ансамбль билг-эрдмән үзүлв. Дуучнр Мулан Артем болн Һәрән Екатерина дуулсн дуд болн «Байрта» гидг көгҗмин болн бииһин студин артистнрин концерт олнд таасгдв.
Москвад тер өдрмүдт зуульчллһна бүрдәцс көдлв. Элстд болн Хальмгин нань чигн һазрт ирҗ амрхин туст эдн миңһәд күүнд үрвр кев.
Сүл цагт Хальмгт зуульчлҗ ирҗәдг улсин то өсчәнә. Зуульчллһ делгрүллһнә халхар Хальмг Таңһч нүүрт йовхиг Петербургск нарт-делкән экономикин хургт келсн үгдән Әрәсән залврин Ахлачин дарук Дмитрий Чернышенко темдглсмн.
Ода Москвад ВДНХ-д болсн цуглранд Хальмг Таңһч зуульчллһна төлә тааста болн соньн һазр болҗахиг олн-әмтн медв.
Хальмг Таңһчин залвр зуульчллһна болн гиичлүллһнә халх делгрүллһнд онц оньг өгнә. Терүнә төлә келн-улсин шишлң төсв күцәгдҗәнә. Тер төсвин дөңгәр зуульчллһна-зәңгллһнә төв тосхгдсмн. 30,3 сай арслң тер тосхлтд һарһгдсмн. 2025–2030 җилмүдт Хальмг Таңһчин социальн-экономическ делгрлтин онц көтлврлә ирлцәд гиичлүрмүдин тосхлтд болн бат ясврт мөңгн йилһгҗәнә. Ода зуульчллһна кесг бәәрн секгдҗәнә болн хаалһс тосхгдҗана. Цуг терүгинь олнд күргҗ медүлснә ашт зуульчнр бийснь Хальмг Таңһчд ирх шиидвр авчахнь йир сән йовдл болҗана. Давсн җилд Хальмгт ут тоодан 115 348 зуульч ирв. Һазадын орнас ирҗәдг гиичнрин то бас өсв. Шаҗна үүлдәчнрин нарт-делкән һурвдгч хург Хальмгт болснь олыг йир икәр соньмсулв. Бурхн Багшин әрүн тоот Элстд авч ирснь, Хальмгин һазрт болдг нань чигн чинртә йовдлмуд әмтнә оньгас алдрҗахш, тегәд эдн нааран ирхәр зүткнә.
Таңһчин сойлын болн зуульчллһна министр Бембин Евгенийин келсәр, зуульчллһна туслмҗиг ясрулхар министерств көдлмшән делгрүлҗәнә. «Таңһчд ирҗәдг әмтн мана сәәхн һазрла, сойлын зөөрлә таньлдхднь эвтә болдгар эн халхин туслмҗан ясрулх кергтә. Цуг терүгинь эн халхин көдләчнр медҗәнә. Цуглрана йовудт хамгин сән дамшлтла таньлдх арһ учрв», - гиҗ ухан-тоолврарн Евгений Владимирович хувалцв.
Зуульчллһна халхар Москвад болсн нарт-делкән ик хург Хальмгт һәәхәд үзх тоотнь олн бәәхиг олнд медүлсн деерән эн халхар үүлдврән улм шунмһадулх төрмүд тәвҗәнә.
ҖИРҺЛИН Кермн

Видео