Хөөнә ноос хулдлһна төрәр күүндв

Сегодня, 15:02 | Общество, Таңһчин зәңгс, Зіњг, Селәнә эдл-аху

Тохма малын Әрәсән һәәхүлин хойрдгч өдрт болсн «төгрг ширән» сүүрт орн-нутгин кесг региона ноос эд-бод кедг бүрдәцсин, фермермүдин эдл-ахусин толһачнр, шинҗләчнр орлцв. Хөн сарин 28-д «Негдсн Әрәсә» партиг дөңнлһнә штабд Әрәсән Федерацд хөөнә ноос һарһлһна төрәр өргн күүндвр болв.
Әрәсән селәнә эдл-ахун Министерствин мал өсклһнә болн тохма малын департаментин һардачин дарук Маргарита Александрова эн сүүриг һардҗ давулв. Ноос һарһлһна йовудын тускар келхлә, Ар үзгин Кавказин болн Өмн үзгин дуһргуд нүүрт йовна, ноос һарһлһна, эн кергт шаңһа дөңгин кемҗән бас өсәд йовна. Энткг орн-нутгин компаньс Хальмг Таңһчд ирҗ ноос хулдҗ авлһна тускар күүндвр кех, шишлң бүрдәцд ноос хулдлһна керг күцәгдҗәнә, эдл-ахус эврән бийснь энд хулдхла, үннь өсәд бәәхмн. Селәнә эдл-ахун кооперативсин чинринь өөдлүлхлә бас олзта-туста болх гиҗ Маргарита Сергеевна темдглв.
Хөөнә ноос эд-бод келһнә төрәр Әрәсән промышленностин болн хулд-гүүлгәнә Министерствин департаментин һардачин дарук Александр Артемов тоолврарн хувалцҗ, күүндврт орлцв.
Цааранднь Хар Һазра района толһач Болдра Валерий хөөнә ноос хулдлһна халхар бәәдг төрмүдин болн эдл-уушин үн өөдлҗәхин тускар келв. «Мана таңһчд кесг зүсн ноос һарһна. Терүг Әрәсәд болн Энткг, Китд орн-нутгудт өөдәнәр үнлнә. Болв ода орн-нутгт болн делкәд ноосн икәр керглгдҗәхш, тегәд чигн зөвтә үнәр энүг хулдҗ авхар седхш. Зуг эн төр хаһлх кергтә, тиим кевәр хө кирһлһнә халхар учрдг һаруг даңцаҗ болхмн. Ода ноосна үннь 40-50 арслң тогтана, кирцхд терүг 500 арслңгар хулдҗ авхла, эдл-ахус болн фермермүд хөөнә ноос һарһлһиг икдүләд бәәх, некврлә ирлцәтәһәр хулдад чигн бәәх. Ода үннь баһ болад, урмд чигн уга болҗана.
Мана өвкнр ик кезәнәс авн хө хәрүләд, ноосинь кирһәд теҗәл кеҗәсмн, кесг юм кеҗ һарһҗасмн. Хөөнә ноосн эргндк бәәдлд харшлдго цевр эдл-ууш болҗана. Тегәд чигн мана өвкнрин кергиг цааранднь делгрүлҗ ноос хулдлһна кемҗәг, эдл-ахусин оруг икдүлх кергтә»,- гиҗ Валерий Астаевич үүмҗ келв.
Тер мет ноосна чинр йилһҗ авдг лабораторьмудын үүлдврин, ноос эд-бод кедг болн хулдҗ авдг арһлачнрин кергт бәәдг төрмүдин, цуг делкән болн Әрәсән рынкд эн туст тогтсн бәәдлин болн нань чигн төрәр мергҗлтнр болн шинҗләчнр «төгрг ширән» сүүрт тоолврарн хувалцв.
Эн сүүрт болн Элстд давҗадг Әрәсән һәәхүлд хәләгдсн төрмүдин тускар «Союзлегпром» бүрдәцин ирлцңгү комитетин ахлач Сергей Пузанов эврә тоолвран бас медүлв: «Тиим ик кемҗәтә Әрәсән һәәхүл бүрдәснд Хальмг Таңһчин һардврт ханлтан өргҗәнәв, дарук һәәхүл бас тана һазрт болх гиҗ нәәлҗәнәв. Хамгин түрүнд хөөнә ноосиг хулд-гүүлгәнә кесг талвңд хулдхин төлә белдх кергтә. Эндр эн һәәхүлд Санкт-Петербургин шишлң бүрдәц орлцҗана, эднә талвңд эдл-уушиг рынкин үнәр хулдҗ болҗана. Тиим кевәр орн-нутгт ноос хулдлһна туст сән таал экләд бүрдәгдҗәнә, цааранднь эн бәәдл улм ясрад бәәх гиҗ ицҗәнәв».
ТҮРВӘН Һуна

Видео