Шаңһа залврин халхар мергҗлтән өөдлүлхәр

Сегодня, 12:29 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Шидр мана таңһчд РАНХиГС-ин Президентск академин шаңһа залврин ик сурһулин көтлврт орлцачнр ирв. Эдн долан хонгин эргцд мана таңһчин социальн-экономическ бәәдлиг шинҗләд, шаңһа залврин халхар төсв белдәд, дамшлт хоршахмн. Хальмг Таңһчин Толһач Хаска Бату көтлврт орлцачнрла харһад, таңһчд күцәгдҗәдг керг-үүлдврмүдин, экономик батруллһна туст кегдҗәдг көдлмшин, зуульчллһ болн сойл делгрүллһнә төсвсин тускар келҗ өгәд, гиичнрин сурврмудт хәрү өгв. «ИнтерМедиаКом» компаньсин багин һардачнрин хүүвин ахлач, эн көтлврин һардач Алексей Куртов, Хальмг Таңһчин залврин Ахлач Босхмҗин Гилән, таңһчин күцәгч йосна элчнр харһлтд орлцв.
- Мана таңһч соньн, өвәрц болн байн регион мөн. Эн һазр байн зөөртә, бидн мана орн-нутгин хот-хоолын әәмшг уга бәәдл тетклһнд ик тәвцән орулҗанавидн. Энд бәәдг әмтн хамгин үнтә зөөрнь болна. Манахс зөрмг, седвәртә, ирсн гиичнрән бүләнәр тосдг, билгтә улс мөн. Советин цагт мана таңһчд олн зүсн бүрдәцс сәәнәр делгрҗ үүлддг билә. Тегәд ода бидн селәнә эдл-ахун болн промышленностин халхар көдлмшән делгрүлх күсл тәвҗәнәвидн. Өдгә цагин некврлә ирлцҗ шин эв-арһс өргнәр олзлх кергтә. Ода мана Әрәсә дорд үзгин орн-нутгудла нөкцлт батрулҗ, теднлә хамцу төсвс күцәҗәнә. Эн туст мана таңһч бас зөвтә орман эзлҗ ик тәвцән орулҗ чадҗана. Мана таңһч бурхн-шаҗна, зуульчллһна халхар олн-әмтиг соньмсулҗана. Тегәд терүг бидн олзта-тустаһар олзлҗ, цуг таал тогтаҗ, агро-, этно- болн экозуульчллһ делгрүлҗәнәвидн. Тадн мана таңһчур түрүн болҗ ирсн улс болҗанат, тегәд хальмг сойлар, бурхн-шаҗар, авъясмудар соньмсад энд давулсн өдрмүд эрк биш уданд тодлгдх гиҗ санҗанав. Мана таңһчд региона дамшлт дәкнәс хоршагдснд бидн байрта бәәнәвидн. Сүл дәкҗ энд дамшлт хоршасн элчнрин баг нүүрлгч орм эзлснь маднд ик бахмҗта болна. Тадн чигн сурһулин көтлврин ашар бас дииләчнрин тоод эрк биш орхин төлә таднд нөкд болад, хамдан диилвр бәрхин туст цугинь кехвидн, - гиҗ Хаска Бату келв.
Таңһчин Толһач Хаска Бату болн таңһчин залврин Ахлач Босхмҗин Гилән «Губернатормудын сурһуль» гидг көтлврт орлцсн болдг. Таңһчин элчнр шаңһа залврин көтлврт бас орлцад, сән медрл хоршаҗ, ода дааврта үүлд көдлҗәнә. РАНХиГС-ин сурһулин көтлврмүд орн-нутгин төлә кадрмуд белдлһнд туслҗана. Бидн цуһар мергҗлтән өөдлүләд, сән дамшлт хоршаҗ аввидн, гиҗ Бату Сергеевич темдглв.
Алексей Куртовин келсәр, шаңһа залврин ик сурһулин көтлвр йисн җил хооран эклв. Әрәсән Президент Владимир Путинә темдглсәр, эн көтлврт орлцачнр таньлдад, ямр нег төр хаһллһнд нег-негндән нөкд болҗ, дамшлтарн хувалцҗ, хамцу үүлдх зөвтә. Ода эн көтлврт орлцҗадг 16 күн Хальмг Таңһчд ирв, эдн мана орн-нутгин кесг региона элчнр болна. Энд дамшлт хоршасна хөөн эдн эврәннь һазртан Хальмг Таңһчин элчнр болх гиҗ Алексей Анатольевич ухан-тоолврарн хувалцв. Келхд, эн көтлврт орлцачнр мана таңһчур дөрвдәд ирҗәнә. «Хальмг Таңһч сүл арвн җилин эргцд делгрәд батрв, энд олн-әмтн ни-негн бәәнә, политикин туст тогтун бәәдл хадһлгдҗана. Региона дамшлтын хөөн болх керг-үүлдврт таңһчин һардвр бас орлцх гиҗ күләҗәнәвидн. Энд көдлҗәдг болн нааран дамшлт хоршахар ирсн улс арһ-чидлән хамцулад, олзта-тустаһар көдлхиг дурдҗанав», - гиҗ күндтә гиич келәд, таңһчин Толһачд «Нүүрләч.Менеджер.Шинҗләч» гидг дегтр белглв.
Региона дамшлтын көтлврт орлцачнр соньмсулҗадг төрмүдәр цәәлһвр авад, харһлтд ухан-тоолврарн хувалцв. Тиигәд, «Әрәсән нүүрләчнр» марһана дииләч Алексей Хижняк таңһчин һардврин төлә ямаран төрмүд хамгин чинртә болҗахар соньмсв. Луганск Улсин Республикәс ирсн «Босхмҗин нүүрләчнр» марһана дииләч Ксения Габович Антрацитовск района әмтнә нерн деерәс Хальмг Таңһчин улст ханлтан өргҗ, цуг халхин дөң-нөкднь эднд ик омг-чидл үүдәнә гив. Липецк мүҗин губернаторин дарук Илья Карлин болхла эднә регионд селәнә эдл-ахун керг күцәмҗтәһәр делгрҗәнә, олн зүсн эдл-ууш эд-бод келһнә, теплицд темс болн цецгүд урһалһна туст сән дамшлт хоршагдв, тегәд Хальмгин элчнриг эдн тал гиичд ирхин туст үрвр кев.
Хальмг Таңһчин залврин Ахлач Босхмҗин Гилән таңһчин социальн-экономическ делгрлтин болн таңһчд күцәгдҗәдг төсвсин болн көтлврмүдин тускар зәңгллһ кев. Әмтнә җирһлин таал ясруллһн, селәдт сән кец-таал тогталһн, арһлачнриг дөңнлһн, әмтнә олз-ору икдүллһн таңһчин һардврин төлә һоллгч төрмүд болҗахиг темдгләд, шаңһа залврин сурһульд орлцачнрт эн долан хонгиг тустаһар давулхд дөң-тусан күргх седклән медүлв.
ДООҖАН Наталья

Видео