Таңһчин эмнлһнә эмчнрин дөң-нөкд

07-03-2026, 13:16 | Общество, Таңһчин зәңгс, Зіњг

П.Жемчуевин нертә таңһчин эмнлһнә эмчнр райодын эмнлһнә бүрдәцст дөң күргхин төлә селәдәр йовҗ бәәрн әмтнә эрүл-мендин бәәдл шинҗлнә. Шидр эмчнр Городовиковск районд одад ирв. Нег өдрин эргцд эдн ут тоодан 150 кү хәләһәд, эмнлһнә туст севлг өгв. Тер мет зәрм улсиг таңһчин эмнлһнә әңгүдт орулад, гүн шинҗллт болн эмнлһ кех болв. Эн өдр эмчнр гемин уршгар гертәсн һарч чаддго улст бас одад, дор ормднь дөңгән күргв.
- Селән һазрт бәәдг әмтнд, нег үлү медәтә болн гемтә-шалтгта улст хотл балһснд одхд амр биш болна. Тегәд райодын эмнлһст мана эмчнр одад, тенд дөңгән күргдгнь эднд тааста болна. Тер мет иим керг-үүлдврмүд ямр нег гемиг эртәснь илдкҗ дарунь эмнлһ эклхд туслна. Бидн района эмнлһнд цааранднь дөңгән күргҗ, нөкцҗ үүлдхвидн, нег өдрин эргцд кесг кү хәләввидн. Зәрмнь мана эмнлһнә кардиологин, эндокринологин, урологин әңгүдт сән эмнлһ авхмн, - гиҗ таңһчин эмнлһнә ах эмч Чумпинә Саглр (зургт) келв.
Тер өдрин бийднь таңһчин эмнлһнә эмчнр района эмнлһнә көдләчнрлә харһад, эн җилин көдлмшин хамцу зура батлв. Таңһчин эмнлһнә эмч Шагҗин Надежда хойр долан хонгин туршарт Городовиковск района эмнлһнд көдлхмн.
Хальмг Таңһчин Толһач Хаска Батун седвәрәр зарлгдсн «Эрүл-менд бәәтн!» гидг керг-үүлдврин йовудт эмчнрин баг моһа сарин 12-т Городовиковск района Веселое болн Лазаревское селәдт көдлхмн. Селәдин әмтн мергҗлтнрлә харһад, эмнлһнә туст селвг авад, гүн шинҗллт кеҗ чадхмн.

БАТАН Сәәхлә

Видео