Зәрм закадт сольвр орулв

Сегодня, 13:59 | Политика, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) депутатнр эн җил түрүн сүүрән давулҗ, ут тоодан йисн төр хәләв. Хальмг Таңһчд федеральн ах инспектор Александр Беляев, таңһчин Улсин Хуралд Хальмг Таңһчин Толһачин элч Манҗин Араш, таңһчин залврин Ахлачин дарукс Цернә Эрднь, Өлзәтин Марина болн Җамбинә Очр, зөв-йос харлһна, зарһин болн бүртклһнә бүрдәцсин элчнр сүүрин көдлмшт орлцв. Хальмг Таңһчин Улсин Хуралын Ахлач Артем Михайлов сүүриг һардҗ давулв.
Авъяст тохрсар, туула сард давсн җилд кеҗ-күцәгдсн көдлмшин аш диглгддг. Тегәд сессьт Әрәсән Минюстин Хальмг Таңһчд үүлддг заллтын һардач Канибек Ураимов болн күүнә зөв харслһна төрәр үүлддг күцц зөвтә элч Валерий Чуб тооцаһан өгәд, депутатнриг соньмсулҗадг сурврмудт хәрү өгв. Таңһчин күцәгч болн зака үүдәгч йосна, бәәрн залврин бүрдәцслә хамцу үүлдҗ, орн-нутгин болн таңһчин закадла ирлцҗ әмтнә зөв харслһна туст нөкцҗ үүлдсиг эдн темдглв. Цергә шишлң керг-үүлдврт орлцачнрин болн теднә өрк-бүлмүдин гешүдин зөв харслһна, социальн теткврин, зәңг-зә уга геедрсн болн шав авсн нег һазра улсин төрмүд хаһллһна туст кегдҗәдг көдлмшин тускар бас келгдв.
Сүүрт «Хальмг Таңһчд административн зөв эвдлһнә тускар» гидг таңһчин заканд сольвр оруллһна туст хойр төсв хәләгдв. Нег төсвин седвәриг таңһчин прокурор орулв, хойрдгч төсв таңһчин залврин седвәрәр орулгдв. Насни дигт күрәд уга бичкдүдин керг-төрин комиссин тогтаврмуд эс күцәсн бүрдәцс административн шоодврла харһхиг депутатнр нег дууһар дөңнв. Дәкәд нег сольвр оруллһиг дөңнснә ашт сән кец-таал тогталһна халхар муниципальн бүртклһ давулдг дааврта таңһчин күцәгч йосна бүрдәцс административн зөв эвдснә тогтавр батлдг болхмн. Тер мет эн халхд дуту-дундс һарһсн дааврта һардачнрин туст шоодвр чаңһах болҗ шиидвр авгдв.
Хальмг Таңһчд баһчудын политик күцәлһнә, дорас өсч йовдг баһ үйд төрскнч сурһмҗ өглһнә төрмүд бас хәләгдв. Эн чинртә төрәр Хальмг Таңһчин баһчудын керг-төрин Агентствин һардач Камиль Маркеев болн таңһчин сурһуль-эрдмин болн номин министр Александр Ким тодрха зәңгллһ кев. Дааврта һардачнрин келсәр, таңһчд бичкдүдин болн баһчудын җисән өргнәр делгрҗәнә, эдн олна бәәдл-җирһлд шунмһаһар орлцна. Таңһчин һардвр баһчудын төрмүдт ик оньг өгнә, тегәд Басан Городовиковин амрлһна Герт бат ясвр кеснә хөөн «Баһчудын Гер» секгдв. Ода Шатрин балһснд баһчудын олн халхин төв секхин төлә бас ясврин көдлмш кегдҗәнә. «Движение Первых», «Юнармия» гидг олна ниицәс баһчудт чик сурһмҗ өглһнд, эднә билг-эрдм делгрүллһнд туслна, спортын болн цергә белдврин «Дәәч» төв «Зарница» нааднд эдниг орлцулна. Шунмһа баһчуд сурһулян сәәнәр сурч, олнд үлгүр-үзмҗ болҗахиг темдглв.
Сүүрт эн җилин зака үүдәгч көдлмшин зура батлгдв, орн-нутгин закадыг дөңнлһнә туст шиидвр авгдв. Сессин чилгчәр федеральн ах инспектор Александр Беляевд Хальмг Таңһчин Улсин Хуралын Ахлачин, депутатнр Эрднин Гиләнд болн Налыка Светланад Хальмг Таңһчин залврин Ханлтын бичгүд бәрүлҗ өггдв. Таңһчин Улсин Хуралын Ахлач Артем Михайлов ачлвринь бәрүлҗ эдниг йөрәв. Дарани сессь моһа сард болхмн гиҗ зуралгдҗана.
ДООҖАН Наталья

Видео