Найн җил хооран болсн ончта йовдл

Вчера, 15:41 | Общество, Таңһчин зәңгс, Зіњг

Найн җил хооран 1946 җилин һаха сарин 11-д Элстд ончта йовдл учрсмн. Элст балһсна чонҗд мөргүл болсн цагт Иисус Христос бууҗ ирсиг әмтн үзсн бәәҗ. Эн җил мана таңһчд эн йовдлын 80 җилин өөн темдглхмн. Үлмҗ өдрлә Хальмгин залврин Герт таңһчин Толһач Хаска Батун һардврт ирлцңгү төрәр сүүр болв.
Өөнин керг-үүлдврмүд давулхин төлә бүрдәмҗин хүүв тогтсн билә. Терүнә ханьд залврин, Элст балһсна һардврин, олна бүрдәцсин, шаҗна элчнр болн зөв-йос харлһна бүрдәцсин һардачнр орсн болдг.
– Төрскән харсгч Алдр дән төгсәд, әмтн бәәдл-җирһлән ясрулхар зүткчәсн цаг билә. Мел тер цагт, 1946 җилд, Иисус Христос Элстд бууҗ ирсн йовдл олн-әмтнд үнн шаҗнд шүтдг арһ өгснь лавта. Тууҗин болн үнн шаҗна чинртә эн йовдлын тускар бидн мартлго, дорас өсч йовдг үйнрт медүлх зөвтәвидн, – гиҗ Хаска Бату онц темдглв.
Тер мет эн йовдлын 80 җилин өөн келн-улсин ниицлтин җиллә ирлцснь бас темдгтә гиҗ келх кергтә. Мана таңһчд олн келн-улсин элчнр хоорндан ахнр-дүүнр мет бәәнә. Тегәд эн ончта йовдлын өөн темдгллһн улсин ниицлһнд улм туслхнь лавта.
Сүүрин йовудт эн ончта өөнлә залһлдата бүрдәгдх керг-үүлдврмүдин тускар Хальмг Таңһчин залврин Ахлачин негдгч дарук Цернә Эрднь тодрхаһар келҗ өгв. Хамгин түрүнд Элстд Иисус Христос бууҗ ирсиг үзсн Семен Бондаренкон үкәриг ясхмн. Элстин доладгч микрорайонд тосхгдҗадг Кирилл болн Мефодийин нертә чонҗин эргндк ормиг Элстд Иисус Христос бууҗ ирснә 80 җилин өөнин талвң гиҗ нерәдхмн. Терүнәс нань Элстин епархин чонҗ бас ясгдхмн, архивин бәрмт цаас олзлад, ончта йовдлын туск фильм цокч авхмн. Терүнә хөөн «Сойл» эс гиҗ «Спас» телеүзллә үгцәд, олна оньгт энүг тусхахмн. Җилин туршт болхла орс шаҗна шишлң көгҗмин концертс, гегән-герлин харһлтс болн һаха сард өөнин һоллгч керг-үүлдвр болхмн.
Элстин болн Хальмг епархин сегләтр, протоиерей Алексей Грищенко Семен Бондаренкон тускар келв. – Мел эн залу күүнә нилчәр олн-әмтнд тер ончта йовдлын тускар медгдв. Семен Тимофеевич 1928 җилд Сарпулин крайяс өрк-бүләрн Хальмгт нүүҗ ирсмн. Троицкое селәнд бәәһәд, чонҗд болдг мөргүлмүдт даңгин орлцдг билә. Тенд чонҗ үүлдврән зогсахлань, Семен Бондаренко Элстин чонҗд йовдг болв. Нег тиим мөргүлин цагт Иисус Христос бууҗ ирсиг эн үзсн болв. Терүнә хөөн эн ончта йовдлыг олн-әмтнд медүлхин төлә эврән Сарпуль балһснд күрәд, шаҗна әрүн зургуд зурачла харһсн бәәҗ. 1947 җилд Семен Тимофеевич Сарпуляс йовһар эн әрүн зургиг Элстд авч ирв, гиҗ Алексей Грищенко цәәлһв.
Темдглхд, сүүр туула сарин 28-д болв, эн өдрлә Элстин болн Хальмгин архиепископ Юстиниан 65 насан зүүв. Ончта өөнләнь йөрәһәд, Хаска Бату Б.Б.Городовиковин орден өрчднь зүүлһв.
– Хальмг Таңһчин улст ханлтан өргҗәнәв! Бидн хамдан байр-зовлңган әдл хувалцҗ бәәнәвидн. Амр биш цагт кен-негән дөңнәд, тусан күргнәвидн. Мел кен-негнәннь байриг хувалцхиг дасч авх кергтә, – гиҗ архиепископ Юстиниан темдглв.
2014 җиләс авн Юстиниан Элстин чонҗд церглҗәнә. Келн-улсин болн шаҗна хоорндк залһлдана халхар арһ-чидлән нөөлго үүлдҗәнә. Тер мет цергә шишлң керг-үүлдврт орлцачнрт болн теднә өрк-бүлмүдт онц оньган тусхана.
Нидн намрар Элстд шар шаҗна нарт-делкән хург сән йовудтаһар бүрдәгдсиг цуһар меднә. Хальмг Таңһч Европд шар шаҗна сойл делгрүллһнә Төв болҗахиг цуг ирсн гиичнр медҗ авв. Тер мет Хальмг Таңһч үнн шаҗна соньн һазр болҗ чадхинь сүүрин йовудт бас заагдв.

КАРСАНА Евгения

Видео