Баатрмудас үлгүр авна

Вчера, 10:46 | Общество, Таңһчин зәңгс, Зіњг, Күн болн җирһл

Майор Санчира Санлын нертә Яшкуль селәнә хойрдгч тойгта сурһульд төрскнч сурһмҗд ик оньган өгнә. Энд Алдр Диилврин 80 җилин өөнд нерәдсн кесг керг-үүлдвр болв, 1941-1945 җилмүдин ветеранмудын туск санлыг сурһульчнр әрүнәр хадһлна, 80 җил хооран дәәнд орлцҗасн эврәннь өвкнрин нериг мөңкрүлхин төлә сурһульчнр хәәврин ик көдлмш кенә, теднә дәәч хаалһин тускар келҗ өгнә.
Төрскән харсгч Алдр дәәнә ветеранмудын кергиг Афганистанд, Чечняд, Сирийд, ода цергә шишлң керг-үүлдврт Яшкулин баһ наста баатрмуд цаарандан давулҗана. Тер тоод майор Санчира Санл Сирийд болсн дәәлдәнд зөргтәһәр орлцҗ әмнәсн хаһцла, түүнә нерн сурһульд зүүлһгдлә. Залу-зөргин орденәр ачлгдсн зөрмг хальмг баатр, гвардин майор Санчира Санл Пальмира балһсна эргнд болсн дәәлдәнд дәврлһ кедг батальонан һардҗ йовад әмнәсн хаһцв. 2016 җилд тер һашута йовдл учрсмн.
Яшкулин 2-ч тойгта сурһульд Санчира Санл эклц классмуд сурчала. «Санлын экнь Зинаида Шаргаевна бас мана сурһульд эклц классмудт багшлҗала, баһ наста көдләчнрин сурһмҗлач бәәсмн. Баатрин эцк Санчира Владимир мана сурһульд тасрхан угаһар гиичд ирнә, көвүнәннь тускар тодлврарн хувалцҗ цергә кергиг яһҗ дасчасинь келҗ өгнә», - гиҗ географин багш Башана Лидия келнә.
Лидия Басанговна сурһульчнриг төрскн һазран медлһнә, Төрскән харсгч Алдр дәәнә болн СВО-н баатрмудын тускар бичлһнә керг-үүлдврт орлцулна, түүнә сурһульч Пүгәнә Бату эврәннь эцкин тускар бичәд «Бичкн төрскм» гидг нертә таңһчин марһанд түрүн орм эзлҗ дииләч болв. «Мини эцк Пүгенә Баатр 1983 җилд туула сарин 30-д һарла. Түүнә эцк-экнь Бадм Сангаджиевич болн Лариса Михайловна һурвн көвү өсклә, Баатр ууһн көвүнь бәәсмн. Яшкулин 2-ч тойгта сурһульд сурчала», - гиҗ Бату бичсмн.
Әәрмд мордад ВВС-т болн ПВО-д дамшлт хоршала. Цергәс бууҗ ирснә хөөн эдл-ахуд көдлв. Өрк-бүлән өндәлһәд һурвн көвүтә болсмн. Ууһн көвүн Батун хойр ахнь ода Хальмг ик сурһулин спортын дацңд сурчана, түүнлә дегц юристин болн цергчин кергиг дасчана.
Эднә эцкнь 2024 җилин лу сард СВО-д орлцсмн, Запорожьен һазр сулдхлһнд орлцҗасмн. Дәврлһ кедг багин командир болҗ церглв, гиҗ Бату эцкиннь тускар бичҗәнә. Работино селәнә эргнд моһа сарин 15-д болсн дәәлдәнд Баатр Бадмаевич болн зәрм үүрмүднь шавтсмн. Болв командир болад Пүгенә Баатр цергә даалһвран күцц бүтәхәр шиидв, үүрмүдән эврә әңгин бәәрнд йовулв. Моһа сарин 17-д түүнлә залһлдан тасрв. Төрскнә сулдхврин төлә әмән өгсн зөргтә командир Пүгенә Баатр Залу-зөргин орденәр ачлгдв.
Баатр Бадмаевич спортд ик дурта бәәсмн, Яшкулин района футболын «Бамб цецг» багин ханьд наадҗасмн, Элстин багшин колледж төгсәснә хөөн Яшкулин спортын сурһульд арвтнриг белдҗәлә.
«Тиигҗ мини сурһульч Бату Төрскнә төлә әмән өгсн зөргтә эцкиннь тускар бичв. Баатр Бадмаевичин санлд нерәдәд, бидн сурһульд футболын болн нань чигн марһас давулнавидн. СВО-д орлцҗ мана сурһулиг төгсәсн зөргтә дәәчнр Адган Санҗ болн Бадмин Игорь дәәлдәнәс бас ирсн уга. Эднә санлыг бидн күндлнәвидн, мана сурһульд Төрскән харсгч Алдр дәәнә болн Афганистанд, Чечняд, СВО-д дәәлдҗ йовсн баатрмудт нерәдсн санлын хора бәәнә, энд дәәчнрин зургуд үзҗ болхмн», - гиҗ Башана Лидия цәәлһв.
Майор Санчира Санлын нертә сурһульд цуг сурһульчнр СВО-г дөңнлһнә керг-үүлдврт шунмһаһар орлцна, эднә эк-эцкнр эрк биш дөң болна, җил болһн тиим буйнч седклин керг бүрдәнә. Дорас өсч йовх үйнр баатрмудын туск санлыг хадһлҗ теднәс үлгүр авх зөвтә.

ТҮРВӘН Һуна

Видео