Өөдән темдгәр ачлгдв

Сегодня, 13:59 | Общество, Таңһчин зәңгс, Зіњг

Көтчнрә района Тугтн селәнд бәәдг олн үртә Бурлыка Нина отг-әәмгтән күндтә, көдлмшч, әмтнлә ээлтә күүкд күн гиҗ тоолгдна. Виктор Богаевич авальтаһан эдн 47 җилдән ни-негн бәәнә, эдн дөрвн үрән асрсн деерән Нина Гаряевнан зе күүкиг өскәд босхсмн. Күүкднь тааста эрдмәрн сурад, бийснь олн үр һарһад, сән улс болсн төләднь Бурлыковихн «Күүкдтән чик сурһмҗ өгсн төлә» гидг темдгәр ачлгдв.
Ноһала, Елена болн Галина күүкднь һурваһад үртә, ор һанцхн Александр көвүнь болхла тавн үртә эк-эцк болна. Нина Гаряевна болн Виктор Богаевич көвүндән нөкд болҗ малд көдлҗәнә. Эдн малын хош нәәмәдлҗ, цөөкн үкр, хө асрад, өрк-бүлән теҗәнә. Герин эзн малын эмчин эрдмтә, тегәд малан арднь орҗ сәәнәр хәләнә. Хәрнь, сүл җилмүдт эн гемтәд, малын хошт нурһлҗ Нина Гаряевна Саша көвүтәһән көдлнә.
- Би эврән өнр-өсклң өрк-бүлд өсләв, ахнр-дүүнрәрн бидн зурһан күн мөн. Экм Настя Семеновна орс күүкд күн, болв хальмг улс дунд бәәһәд, цуг авъясмудыг сәәнәр меддг билә. Мордхлам хадм экм Анна Николаевна һарлдсн күүкнлә әдл нанд нөкд болдг бәәсмн. Экдән болн хадм экдән би ханлтта бәәнәв, күүкд-күргдтән болн бердән бас килмҗән тусхаҗ, ачнр-зеенрән хәләһәд дөңгән күргнәв. Урднь үүл бәрҗ юм өлгдг-уйдг биләв, ода нүднә харан муурв. Күүкдтән бичкнәснь авн үүл бәрдгиг дасхлав, ода дорас өсч йовдг ачнр-зеенртән медсән заанав, - гиҗ Нина Гаряевна келнә.
Экин сән Өдрлә Бурлыковихнә герт шуугата болна, күүкднь болн ачнр-зеенрнь эңкр экән болн ээҗән йөрәхәр ирнә. Күүкднь үнтә белг авч ирхәр шунна. Бичкдүд эврә һарарн кесн кегдлмүд ээҗдән белглҗ байрлулна.
ДООҖАН Наталья

Видео