Хальмгин нер туурулв

Сегодня, 11:46 | Общество

Хальмг Таңһчин элчнр сән авъяст тохрсн төрскн келнә багшнрин Цугәрәсән марһанд ончта йовдл үзүлҗәнә. Давсн җил Элстин 24-ч тойгта садын хальмг келнә багш Балакан Екатерина түрүн болҗ тиим ик марһанд хойрдгч орм эзлв.
2025 җилин «Төрскн келнә болн утх-зокъялын йилһән сән багш» гидг Цугәрәсән марһан мана ах-дү Бурять Республикин Улан-Удэ хотл балһснд болв. Энд мана орн-нутгин 87 субъектәс 200 һар багш цуглрв. Эдн төрскн 37 келнә багшнр болна.
Улан Удэд эн җил болсн ик марһанд мана Хальмг Таңһчин хотл Элст балһсна 20-ч тойгта садын хальмг кел дасдг дөрвтә-тавта бичкдүдин багин сурһмҗлач Настан Виктория диилвр бәрҗ, таңһчин нер туурулв.
Садын сурһмҗлачас тавн күн финалд һарв, тер тоод Забайкальск краяс Баира Барадиева, Коми Республикәс Анастасия Панычева, Алтай Республикәс Карана Тобошева, Тулан мүҗәс Анна Беляева болн мана Хальмг Таңһчас Настан Виктория ашлгч девсңд орв.
Ашлгч марһанд эдн мастер-класс үзүлҗ, «Вектор развития» гидг төрәр Әрәсән гегән-герлин министрин дарук Ольга Колударовала сурһуль-эрдмин төрәр күүндвр кев, тер хойр марһанд йилһрәд, Настан Виктория «Сурһульд орад уга бичкдүдин төрскн келинь өргҗүллһнә йилһән сән дамшлт» гидг әңгд түрүн ормд һарв.
- Мини селвгчнрин үг соңсад, эврә дамшлтан олзлад, талдан орлцачнрин эв-арһиг олзлад иим ик күцәмҗд күрләв. Диилхүв гиҗ нам санҗасн угав. Тегәд эврә нерән соңсхла, ик гидгәр байрлув, дарунь намаг үүрмүд, талдан регионас ирсн шин таньлмуд йөрәхлә, тернь мел үнн бәәсинь иткүв, – гиҗ Виктория Анатольевна келнә. Диилврүр күргсн хаалһ амр биш билә. Түрүләд сән гисн 15 сурһмҗлачин тоод орх кергтә болв, дәкәд эднәс тавн мергҗлтиг йилһҗ авв, тер хойр девсңгиг мана таңһчин элч чинвртә дөрлдәнә таалд давҗ һарв.
- Виктория Анатольевнаг мана 20-ч тойгта садын көдләчнр кесг дөрлдәнә йовудт кезә чигн дөңнҗ йовла, түрүләд таңһчин, дәкәд Цугәрәсән марһанд чигн. Дамшлтта сурһмҗлач болсн деерән Настан Виктория Элстин билг-эрдмин колледж төгсәлә, домбр цокна болн ятх татна, –гиҗ садын һардач Анна Хаминова келв. – Тиигҗ авсн көгҗмин сурһуль-эрдм мана дамшлтта сурһмҗлачд дөң болна. 20 һар җилдән Виктория Анатольевна сурһуль-эрдмин салврт көдлҗәнә. Хальмг кел дасдг 3 баг мана садт бәәнә, теднә негинь Настан Виктория һардна, төрскн кел дасхна, – гиҗ Анна Александровна келҗ өгв.
Эк-эцкнр сурһмҗлачиг икәр күндлнә, теднә күүкднь терүнә һардврт төрскн кел дастха гиҗ некнә. Ода садт хальмг кел даслһна эк-эцкнрин клуб үүлдҗәнә, терүнд Виктория Анатольевна кичәлән бас өгнә.
Таньл-үзлнь, таңһчин талдан садмудын болн сурһульмудын көдләчнр Виктория Анатольевнаг ик күцәмҗләнь йөрәҗәнә, садын коллективин, терүг дөңнҗәсн багин үүлдвр йир сән гиҗ эдн темдглв. Тавн сән гисн сурһмҗлачнрин тоод орна гидгнь тертн ик гидг күцәмҗ гиҗ эдн Настан Викторияг буульҗана. Тернь мел чик үг, тиим күцәмҗд күрхин төлә бат авг-бәрцтә, медрлтә, сән дамшлтта болх кергтә. Тиим кевәр Виктория Анатольевна Хальмг Таңһчиг чигн нертәһәр элчлв.
Тиигчкәд мана садмудт йоста сән мергҗлтнр көдлҗәнә гиҗ лавтаһар келҗ болҗана, эврәннь дамшлтарн ода талдан сурһмҗлачнрла хувалцҗ бичкдүдт төрскн келнә сән медрл өгтхә гиҗ дурдҗанавидн. Настан Викториян бәрсн диилврнь талдан сурһмҗлачнрт сән үлгүр болҗ урмд өгтхә!

ТҮРВӘН Һуна

Видео