Хойр районд шин көлгн белглгдв

Вчера, 14:08 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр Элстд Диилврин талвңд «КТР-Р» АО-н һардвр Ик Буурла болн Хар Һазра райодт шин көлг белглв. Хальмг Таңһчин Толһач Хаска Бату, «КТР-Р» АО-н һардач Николай Горбань, РМО-син элчнр болн сойлын көдләчнр керг-үүлдврт орлцв.
Хаска Батун келсәр, Көк теңгсин турван сурвлҗна бүрдәц мана таңһчла олн җилдән нөкцлтҗәнә. Чинртә төсвс күцәлһнд даңгин дөңгән күргнә.
– Өдгә цагт бидн Элстд болх шар шаҗна нарт-делкән чуулһнд белдҗәнәвидн. Эн туст «КТК-Р» маднд бас нөкд болҗана. 2016 җиләс авн компань таңһчин эрүл-менд харлһна, сурһуль-эрдмин, сойлын болн спортын бүрдәцст 56 автобус болн шишлң техник белглв. Тер мет муниципальн бүрдәцст 28 машин белглгдснь бас чинртә йовдл болв. 2024 җилин ашар «КТК-Р» алвна тоод таңһчин хазнд 3 җува һар арслң орулв. Социальн төсвс күцәлһнд болхла 157 сай арслң һарһгдсн болдг, – гиҗ Бату Сергеевич темдглв.
Дарунь Николай Горбань үг авч, шидр өргнәр темдглгдсн Хальмг Таңһчин сән Өдрлә цуглрсн улсиг йөрәв.
– Олн-әмтнә төлә бидн сән таал тогтах зөвтәвидн. Энүнәс иштә цаарандан чигн буйнч седклин кергүдән давулад бәәхвидн, – гиҗ Николай Николаевич иткүлв.
Ик Буурла болн Хар Һазра райодын сойлын төвмүдин элчнр Аджадыка Нинад болн Мухаран Светланад 19 күн багтамҗта шин автобусмудын түлкүр бәрүлҗ өггдв. Үнтә белг авсн райодын сойлын коллективс ода болхла таңһд бәәтхә, талдан регионмудт йовад, олн наадмд болн марһаст орлцҗ чадхмн, гиҗ эдн ханлттаһар келв.
Терүнәс нань хойр муниципалитетд уудг цевр ус әмтнд зөөҗ күргхин төлә шишлң машид бас белглв. Келхд, эн машидин дотр киитрүлдг кергсл бәәнә. Тегәд нег үлү мана һаң халунд эннь тааста болхмн. Белглсн көлгнә үн 24,5 сай арслң тогтав.
Тодлхас, «КТР-Р» АО буйнч седклин кергүдт даңгин орлцдгинь нег һазра мана улс сәәнәр меднә. Урднь «Уралан» нертә олимпийск чемпионмудыг белддг спортын сурһульд автобус белглсн билә. Тер мет «Төрскн һазрин йиртмҗин бәәдлиг хадһлый» нертә төсв күцәлһнә йовудт «Хар Һазр» шаңһа заповедник шин кергсләр, шинҗләчнр болхла шишлң хувцар теткгдв. Терүнәс нань Элст балһсна, Ик Буурла болн Хар Һазра сурһуль-эрдмин 20 бүрдәцс ус цеврлдг шишлң кергсләр бас теткгдсинь заахмн.
– Кесг җилдән эрүл-менд харлһна, сурһуль-эрдмин, спортын, экологин болн талдан халхар дөң-тусан күргҗәдг компаня һардврт Хаска Бату ханлтан өргҗ, цааранднь чигн нөкцлтән батрулҗ көдлхвидн гиҗ товчлв.

КАРСАНА Евгения

Видео