Татьяна Чиктееван седклин дуд

11-04-2024, 14:54 | Общество

Әрәсән ачта артистк, Хальмг Таңһчин улсин артистк Татьяна Чиктееван концерт шидр Элстд болв. Дурта дуучин дууһинь соңсхар олн күн цуглрҗ ирв. Олн җилин туршарт дууһинь соңсч, седклин сергмҗ авч йовх әмтн Татьяна Чиктееван ду болһниг меднә. Седклин бүлән таалд давсн концерт дуучин дууна хаалһ ямаран соньн болн хөвтә бәәсиг медүлв.

Нертә дуучин үүдәгч җирһлнь «Бамб цецг» ансамбльла бат залһлдата. Төрскн коллективин ханьд Татьяна төрскн теегин болн талдан олн һазрин тәәз деер дуулҗ йовла. Төрскн коллективнь дуучин концертд белдәд, олн зургуд, видеоклипмуд нәәрин йовудт орулснь Татьяна Чиктееван баһ цагинь тодлулҗ, нертә талдан дуучнрла нег тәәз деер дуулҗ йовсинь, Манҗин Аркадин кесг ду дуулсин, хамдан дуулсинь дәкнәс соңсҗ билгтә хойр күүнә седкләс төрсн дуд олн миңһн күүнә седклд күрч, байр белглҗ йовхиг медүлв. Хальмг ик сурһулин һардач Салаев Бадм, медәтнрин Хүүвин ахлач Эрднь Пашнанов, «Мана зөөр» буйнч седклин саңгин ахлач Иван Басангов йөрәлин үг келҗ, цецгүд болн белгән дуучд бәрүлҗ өгв. Нег һазра әмтн концертд оларн ирҗ, дуучин байриг хувалцв. «Ик-Буурла района күндтә иргн» гидг күндтә нерн Татьяна Чиктеевад зүүлһгдв. «Бамб цецгин» коллективин нерн деерәс ансамблин һардач, Хальмг Таңһчин билг-эрдмин ачта үүлдәч Савр Катаев Татьяна Чиктееваг йөрәһәд, үүдәгч үүлдвринь үнләд, мөңгнә сертификат белглв.

(полную версию статьи можно посмотреть в бумажной версии выпуска № 37 (19018) 11 апреля 2024 года, четверг)

ХӨӨЧИН Галина

Видео