Хаврин болн күч-көлснә байран тосхмн

27-04-2024, 12:40 | Общество

Хөн сарин түрүн өдр мана орн-нутгт хаврин болн күч-көлснә байрин Өдр темдглнә. XIX зун җилин чилгчәр эн сән өдрин тууҗ эклнә. Тер цагт күч-көлсчнрин җисән шинкн делгрлт авчасмн.
Советин Союзин цагт хөн сарин 1-д орн-нутгин иргнмүд өрк-бүләрн, элгн-садарн, бүкл бүрдәцсәрн балһсд-селәдәр уульнцсар йовҗ, ке-сәәхн хувцан өмсч, нег һазра улслаһан мендлҗ, шуугата нәр-нааднд орлцад, эн өдриг өргнәр темдглдг бәәсмн. Майин 1-д нерәдгдсн дуудврта тугмудан делскәд, олн-әмтн демонстрацд орлцад бәәсән ода бийнь сәәнәр тодлдг болх. Балһсдын талвңгудт олн зүсн концертс, спортын марһас бүрдәгддг билә, тенд әмтн олар цуглрдмн.
Хаврин сүл сарин амрлһна өдрмүдт олн-әмтн үр-иньгүдәрн, элгн-садарн теегт һарч, цевр аһар киилдг авъяста бәәсмн. Тер юңгад гихлә зун өөрдәд, һаза дуларад, әмтн йиртмҗин сәәхниг, эргндк бәәдлиг һәәххәр теегт һардмн. Селәдт бәәдг улс болхла, герән ахулҗ, цаһалһад ширддмн.
Йирдгч җилмүдт СССР-ин орн-нутг тарад, эн өдр чинрән соляд, оңданар темдглгддг болв. 1990 җилин хөн сарин 1-д сүүлңк демонстрац болла. Тегәд өдр хаврин болн күч-көлснә байрт хүврснь тер. Өдгә цагт эн өдр байрин концерт болна, олн-әмтн элгн-садндан гиичд одад золһна, сул цаган сергмҗтәһәр давулна.
Мана таңһчд болхла, тогтсн авъясар җил болһн хөн сарин 1-д мөрнә урлдан болна. Терүнд хамгин хурдн арнзлмуд орлцна. Марһан болсн һазрт йириндән олн-әмтн хурдг гидг. Диилвр бәрснь гиигн машиһәр ачлгдна. Эн җил болхла Көтчнрә района Ергенинский селәнә шидр мөрнә урлдан болхмн.
– Бидн болхла эврә умшачнран хаврин сән Өдрлә халун зүркнәсн йөрәҗ, цугтан эвин таалд эн-тер уга, маңна-тиньгр, сән-сәәхн бәәх болтха, гиҗ дурдҗанавидн!

ОЛЬДАН Цаһан

Видео