Сүл хоңх таңһчин цуг сурһульмудт җиңнв

Вчера, 10:37 | Общество, Таңһчин зәңгс, Зіњг, Сурєуль-эрдм

Эндр Хальмг Таңһчин цуг сурһульмудт «Сүл хоңх» байрин керг-үүлдвр болв. Эн җил 11-ч класс төгсәҗәдг күсдундур миңһн шаху болн 9-ч класс төгсәҗәдг һурвн миңһн сурһульчин төлә сүл хоңх җиңнв. Удл уга эдн шаңһа шүүврән өгхмн. Элст балһсна Көглтин Даван нертә 17-ч тойгта сурһулин 11-ч «Б» классин сурһульчнр мөчн сард эклх шүүврән өгснә хөөн тааста эрдмән шүүҗ авад, ик сурһульд орхар шунхмн.
Сурһулян йилһән сәәнәр сурдг күүкд Орһан Наяна болн Баглин Ноһан ончрсн болдг. Наяна утх-зокъялын болн МХК-н таңһчин олимпиадын дииләч, Цугәрәсән марһанд орлцҗ гүн медрлән үзүлсмн. Англь келнә таңһчин марһанд бас күцәмҗ бәрв. Күүкн балһсна олимпиадт нүүрләчнрин тоод орҗ нер һарсмн.
Башенкан Саяна, Озан Алина, Боган Наяна, Шибҗин Замьян «Бичкн төрскм» гидг таңһчин номин-дамшлтын хургин муниципальн болн таңһчин девсңгин дииләчнр мөн. Конан Дарья РАНХиГС –ин тууҗин марһанд диилвр бәрсмн, зөв-йосна халхар регионмуд хоорндк олимпиадын ашлгч девсңгин орлцач, спортын таңһчин марһана дииләчнрин тоод бас орсмн. Төрскн келән сәәнәр меддг баһчуд энд бас бәәнә. Үлгүрнь, Мергнә Арина хальмг келнә таңһчин олимпиадт диилвр бәрсн деерән, эн тхэквондо бөк бәрлдәнә улан бүстә күүкн мөн. Тиим олн билгтә арвтнр Элстин 17-ч тойгта 11-ч «б» класст сурна.
Эн класст 10 көвүн болн 18 күүкн сурна. Цуг олна керг-үүлдврт Марила Церн, эврә сән дурар үүлддг седвәртә болн шунлтта сурһульчнр орлцҗ йовсмн, эднд ханлтан өргҗәнәв. Мана классин спортсменмүд Цугәрәсән болн ЮФО-н марһаст йилһрҗ Хальмг Таңһчин нер туурулв. Эңкр мини сурһульчнрт болн сурһулян төгсәҗәдг таңһчин күүкд-көвүдт күцәмҗ дурдҗанав, шүүврән сәәнәр өгәд, дурта эрдмән шүүҗ авад, ик сурһульд ортха, - гиҗ классин һардач Боган Байрта йөрәв.
Элстин болн райодын, селәдин сурһульмудт эндр сүл хоңх җиңнв. Эднә сурһульчнр бас олна керг-үүлдврт орлцҗ, гүн медрл хоршаҗ йилһән сәәнәр сурһулян сурад, багшнрин төлә бахмҗ болна. Эдн шүүвртән белдсн деерән, «Зарница» нааднд, СВО-д орлцачнрла болдг харһлтст, Алдр Диилврин өөнд нерәдсн хәәврин көдлмшт, марһаст, санлын керг-үүлдврмүдт орлцна. Эдн төрскнч седклтә арвтнр мөн, иргнә даалһврин тускар мартхш.
Сурһулин җил төгсснә байрт бичкдүд болн арвтнр концертән белдв. Ода эдн төрскн сурһульдан зуг шүүврин хөөн цуглрҗ эк-эцкнрин болн багшнрин йөрәлин үг соңсч, тааста ик сурһульдан орхар белдхмн. Хаалһтн цаһан болтха!

ТҮРВӘН Һуна
Зургт: Элстин 17-ч тойгта
дунд сурһулин 11-ч «б» классин сурһульчнр классин һардачла хамдан

Видео