Суңһврин туск закадт сольвр орулгдв

25-04-2024, 10:30 | Политика

Шидр Хальмг Таңһчин Улсин Хуралын (Парламентин) дарани биш зурһадгч сессь болв. Терүг таңһчин Улсин Хуралын Ахлач Артем Михайлов һардҗ давулв. Хальмг Таңһчд ах федеральн инспектор Александр Беляев, Хальмг Таңһчин залврин Ахлач Босхмҗин Гилән, энүнә дарукс, Улсин Хуралд таңһчин Толһачин элч Манҗин Араш, зөв-йосна болн зарһин, олна бүрдәцсин элчнр сессин көдлмшт орлцв.Сүүрт ут тоодан 12 төр хәләгдв. Хамгин түрүнд депутатнр олна ниицлтин зарһчнрин үүлд Бурвяша Санлыг, Антона Гернзлиг болн Бастан Баираг цаг-болзг уга кемд батлв. Депутатнр эдниг нег дууһарн дөңнҗ, күцәмҗтәһәр үүлдхиг дурдв. Эн сессьт хәләгдсн төрмүд дунд «Хальмг Таңһчин Толһачин суңһврин туск» болн «Хальмг Таңһчин бәәрн залврин бүрдәцсин суңһвр давуллһна зәрм төрмүдин туск» гисн таңһчин закадт сольвр оруллһна төрмүд хәләгдсмн. Тегәд эн төрмүдәр Улсин Хуралд таңһчин Толһачин элч Манҗин Араш соңсхвр кеснә дару депутатнр ухан-тоолврарн хувалцад, өргн күүндвр болв. Эн төрмүд урдаснь зака үүдәгч комитетд хәләгдсн билә, зәрм дуту-дундсиг чиклснә хөөн эдн терүг дөңнх шиидвр батлв, гиҗ комитетин ахлач Эрнҗәнә Петр келәд, закадын төсвсиг батлх сүв-селвг орулв.
Эн сүүрт 2023 җилд Әрәсән юстицин министерствин Хальмг Таңһчар үүлддг заллтын болн бичкдүдин зөв харслһна элчин үүлдврин туск илдкл депутатнрин оньгт тусхагдв. Минюстин таңһчин заллтын һардач Канибек Ураимов болн Чуҗан Наталья давсн җилин эргцд кеҗ-күцәсн көдлмшин тооца кеҗ, депутатнрин сурврмудт тодрха хәрү өгв. Әрәсән юстицин министерствин региональн заллт таңһчин Улсин Хуралын депутатнрла нөкцҗ үүлдҗ, олн төрмүдәр сүв-селвгәрн хувалцҗ, закадыг, тогтаврмудыг дигллһнә төриг хамдан хаһлна гиҗ Артем Михайлов темдглв. Бичкдүдин зөв харслһна элчин медлд тогтагдсн бичкдүдин хүүв зака үүдәгч бүрдәцлә бас бат залһлда бәрнә, депутатнр насни дигт күрәд уга бичкдүдин зөв харслһна закад батлҗ эн төриг онц оньгтан бәрнә гиҗ бас келгдв. Депутатнр бичкдүдиг көдлмшәр тетклһнә, үр көвүчлҗ авсн өрк-бүлмүдт ямаран демин мөңг өгдгин, күнд җирһлин таалд туссн улсин бичкдүдин зөв харслһна кергүдин тускар соньмсад, сурврмуд өгв.
Таңһчин Улсин Хуралын Ахлачин дарук Нуура Николайин седвәрәр «Хальмг Таңһчин шаңһа ачлврмудын туск» гидг заканд сольвр оруллһна закана төсв сүүрт хәләгдв. Бичкдүдт чик авг-бәрц батрулҗ, спортын халхар ик күцәмҗ бәрсн дамшачнрин ач-тус хәрүлҗ «Хальмг Таңһчин ачта дамшач» гидг нер батлх сүв-селвг эн орулсмн. Депутатнр эн седвәриг таасад, таңһчин заканд сольвр орулхиг нег дууһарн дөңнв. Тер мет депутатнр таңһчд һазрин хәрлцәг дигллһнә, муниципальн цергллтин, шаңһа закадын төсвсиг үнллһнә туск закадын төсвс бас хәләҗ, ирлцңгү шиидвр батлв. Депутат Аюша Гилән Оренбургск болн Белгородск мүҗсин улст дөң күрглһнә буйнч седклин кергт орлцсн депутатнрт ханлтан өргҗ, бәәрн улс халун мендән илгәв гив. Сүүрин чилгчәр депутатнр суңһачнрла харһҗ, тооцаһан өгчәхин тускар бас келгдв.
Хальмг Таңһчин Улсин Хуралын (Парламентин) Ахлач Артем Михайлов сессин көдлмшиг ашлад, сүүрт батлгдсн закадын туск ухан-тоолврарн олнд зәңгллһнә эв-арһсин көдләчнрлә хувалцв. «Эн җил намртан мана таңһчин Толһачин болн Элст балһсна Хургин депутатнрин суңһвр болхмн. Тегәд ирлцңгү закадт сольвр орулгдснь темдгтә болҗана. Таңһчин Толһачин суңһврин туск закан ода шин чинртә болв, тиигәд эн үүлд суңһгдх кандидат ода муниципальн депутатнрин дууна 7 процент цуглулх зөвтә, урднь тернь 9 процент тогтаҗасмн. Дәкәд сольвр орулгдсна хөөн кандидатын суңһврин саңгин кемҗән икдүлгдв. Келхәс, 2012 җиләс авн терүнә кемҗән сольгдад уга бәәсмн. Ода саңгин кемҗән 12 сай арслңгас авн 80 сай арслң күртл икдв. Муниципальн йосна бүрдәцсин суңһврин туск заканд бас сольвр орулгдсна хөөн партьс эврә гешүдин баг бүрдәҗ чадхмн. Зөв-йос харлһна бүрдәцс эн закадын төсвсиг дөңнҗ, сән таласнь үнлв, комитетин гешүд бас тодрха күүндвр тогтаҗ цуг төрмүдиг хаһлв. Эн җил һаха сарин 8-д мана орн-нутгт суңһврин негдсн өдр болхмн, бидн эн өдр таңһчин Толһачиг болн ЭГС-ин депутатнриг суңһҗ авхвидн. Ирх җилд райодын муниципальн бүрдәцст суңһвр болхмн, тегәд урдаснь закадыг чиклҗ авснь эн дааврта керг-үүлдврмүдиг дигтә-даратаһар бүрдәхд туслхнь лавта», - гиҗ Артем Васильевич келв.
ДООҖАН Наталья

Видео