Әрәсән Баатрин нерн алдрштха!

Сегодня, 12:15 | Общество, Таңһчин зәңгс, Зіњг, Эдн Төрскән харсла

Әрәсән Баатр Очр-Һәрән Нарн цергә шишлң керг-үүлдвр эклснәс авн зөрмг кевәр дәәлдҗ, Соледар, Северск болн нань чигн балһсд-селәдт болсн ик дәәлдәнд залу-зөрмгән үзүлсмн. Эгл җолач болҗ цергә хаалһан экләд, батальона һардачин дарук болад, хамдан дәәлдҗ йовсн үүрмүдтән нүдн-амн болҗ цергә даалһвран күцәҗ йовсмн. Нидн Северск балһс сулдхлһнд Нарн Алексеевичин һардврт мана дәәчнр залу-зөрмгән үзүләд, хортна өмнәс дәврәд, дәәлдснә тускар эн Әрәсән Президент Владимир Путинд тооцаһан өгсиг бидн цуһар соңсад, нег һазра баатр бахмҗ үүдәлә.
Тер дәәлдәнә хөөн орн-нутгин толһач Очр-Һәрән Нарнд Әрәсән Баатрин нер зүүлһәд, өөдән ачлвринь бийнь бәрүлҗ өгсмн. Дарунь эн Әрәсән Президентин «шуд күүндврт» орлцҗ, цергә үүлдвриннь, хамдан дәәлдҗ йовдг үүрмүдиннь зөрмгин, баатр йовдлмудын тускар келснь бидн бас оньган өгч соңссн биләвидн. Шин җилин өмн өргнд Нарн Алексеевич ахр амрлһндан герүрн хәрҗ ирәд, таңһчин баһчудла харһсмн. Төрскн, зөрмг, цергә даалһвр энүнә ик чинртә болҗахиг келәд, төрскнч седклтә улс болҗ өстн гиҗ баһчудт заавр өгсн билә. Дәкнәс цергә шишлң керг-үүлдврт орлцхар йовҗахан гиҗ тиигхд эн келсмн. «Әмд-менд хәрҗ иртн!» - гиҗ баһчуд Әрәсән Баатрт дурдсн болдг.
Шидр Әрәсән Баатр, батальона һардачин дарук, ах лейтенант Очр-Һәрән Нарн цергә даалһвран күцәҗ йовад, әмнәсн хаһцсна туск һашута зәңг ирв. Хальмг Таңһчин Толһач Хаска Бату таңһчин бәәтхә, цуг мана орн-нутгин күн болһна зүркнд өвдкүр болҗ төөнрсн зәңгәр хувалцад, Нарн Алексеевич зөрмг баатр бәәсиг темдглв. «Мана нег һазра нертә күн, Әрәсән Баатр, батальона һардачин дарук, ах лейтенант Очр-Һәрән Нарн йоста дәәч, офицер, андһартан итклтә болдгин үлгүр мөн. Хальмгин, цуг орн-нутгин, мини төлә энтн ик зовлңта болн һашута йовдл болв. Нарн Алексеевич зөрмг, чаңһ авцта күн бәәсмн. Эн орн-нутгиннь әәмшг уга бәәдлин, мана улсин төвкнүн җирһлин төлә даалһвран үнн кевәр күцәв», гиҗ таңһчин Толһач келәд, элгн-саднаннь, хамдан церглҗ йовсн үүрмүдиннь зовлң хувалцҗ һундл төрв.
Одахн гилтә, Алдр Диилврин Өдрлә, Очр-Һәрән Нарн Москвад болсн парадт орлцад, Әрәсән Президентлә болн дәәнә ветеранмудла хамдан Улан талвңд байриг темдглсн билә. Хальмг Таңһчин Толһач Хаска Бату Нарн Алексеевичд шаңһа көдлмшт орлцх үрвр кесн бийнь эн хамдан церглҗ йовсн үүрмүд талан йовхв гиҗ келәд, дәкн цергә керг-үүлдврт орлцсмн. Дәәлдәнә завсрт цокч авгдсн нег зурцд Очр-Һәрән Нарн нег һазра улс илгәсн белг авснд ханлтан өргәд, олн-әмтн цергчнриг дөңнҗәхнь чидл-омг өгнә гиҗ келснь ода тодлгдна. «Та Әрәсән Баатрин өөдән цол зүүсн бийнь цергә даалһвран күцәҗ йовнат. Офицер болна гидгнь ямаран?» гиҗ сурснд, офицер болхд ик дааврта, мини һардврт бәәдг күн болһна тускар ухалх кергтә, цергә даалһвран үнн кевәр күцәҗ наадк дәәчнрт үлгүр болх кергтә, - гиҗ Нарн Алексеевич хәрү өгснь темдгтә.
Әрәсән Баатр әмнәсн хаһцсна туск зәңг таңһчин улсиг икәр үүмүлв. Хальмг Таңһчин Олна палатын седвәрәр мөчн сарин 6-д Баатрмудын аллейд санлын митинг болв. Баһчудын олна ниицәсин гешүд, цергә шишлң керг-үүлдврин ветеранмуд, эврә сән дурар үүлддг медәтнр чигн Әрәсән Баатр Очр-Һәрән Нарна зургин өөр зул өргәд, цецгүд тәвәд, санлынь тевчв. Таңһчин Олна палатын ахлач Мучан Батыр, СВО-н ветеран Нахошкинә Мингиян, «Движение первых» җисәнә һардач Анхана Саглр, «Бидн хамдан» төвин һардач Шахныка Татьяна, таңһчин баһчудын төвин һардач Саңһҗин Эрднь Әрәсән Баатр Очр-Һәрән Нарн күн болһна санлд мөңкинд үлдҗ, залу-зөрмгин үлгүр болҗ тодлгдх гиҗ темдглв.
ДООҖАН Наталья

Видео