Йосна үүлдәчин санлд

23-09-2021, 11:02 | Общество

Орсин йосна болн шаҗна үүлдәч әрүн Александр Невскин санлд нерәдҗ, орн-нутгт байрин ик керг-үүлдврмүд болв. Хальмгт чигн орс һазриг негдүлҗ, йосинь батлсн эн ик үүлдәчин өөниг темдглв.

Элстин болн Хальмгин архиепископ Юстиниан Яшкулин чонҗд әрүн Александр Невскин санлд нерәдсн байрин мөргүл кесмн. Яшкулин әмтн болн зуульчлҗ йовсн Әәдрхнә әмтн тер ик мөргүлд орлцв. Эдн чонҗ күртл йовһар йовад орс һазрин шаҗна әрүн үүлдәчин санлыг тевчв.
Яшкулин чонҗ әрүн Александр Невскин нериг зүүнә. Эн чонҗд болн шаҗнд шүтдг әмтнд нерәдҗ, архиепископ А. Невскин әрүн дүриг тодлулсн шүтә болн әрүн ирлтә хәәрцг авч ирв. Мөргүлин хөөн әмтн терүнд мөргҗ зальврв.

Тантрическ мөргүлмүд болхмн
Хальмгт җил болһн тантрическ мөргүлмүд келһн сән авъяст тохрв. Эн җил шаҗна ик керг-үүлдвр Бурхн Багшин Алтн сүмд хулһн сарин 2-т эклҗәнә. Хальмгин шаҗн лам Тэло Тулку ринпоче эн керг-үүлдвриг һардҗ давулхмн.
Күн болһнд кергтә амулң-менд болн бәәхтә бәәдл делдгч «Янгдруб» шаҗна йосрхлар тантрическ мөргүлмүд эклхмн. Цааранднь ут нас наслхд туслх «Джинсег» гидг йосрхл күцәгдхмн. Хулһн сарин 5-д әмтн «Торгъяк» шаҗна йосрхлд орлцхмн.
Тантрическ керг-үүлдврмүдиг ашлгч «Танграг кангсо» гидг шаҗна үүлдвр цуг әмтнд ик туста болхмн. Евәлтә эн керг-үүлдврт әмтн хулһн сарин 6-д орлцҗ чадхмн.
Кезәнәс авн әмтнд амулң-менд җирһл делдҗ, ут наста болхд, керг-үүл уралан делгрхд дөң болҗ йовсн шаҗна үүлдврт орлцҗ, цаарандк бәәдл-җирһлдән йовуд өгцхәй.
УШКАНА Сувсн