Шатрар марһан болв

13-04-2021, 17:00 | Спорт

Давсн долан хонгин чилгчәр Әрәсән әңгин Хальмгин пенсионермүдин ниицәнә, таңһчин шатрин негдлтин болн РФ-н Хальмг Таңһчар үүлддг пенсионн саңгин седвәрәр шатрар РДЮСШ-н бәәрнд пенсионермүдин дунд швейцарин эв-арһар шатрин марһан болв. Дөрлдәнә ах зарһч Бормаңнан Баатр нүр үгәр секәд, марһанд орлцачнриг йөрәһәд, наадна зокалын тускар цәәлһв.

Долан девсңтә марһанд һол кубокин төлә 14 күн дөрлдв. Аштнь Шамкан Анатолий 7 нааднд 6 диилвр бәрәд, һол кубокар болн негдгч девсңгин Күндллһнә һашгар ачлгдв.
Ладьяна Юрий болн Нусхна Дмитрий тавад очкота болв, зуг невчкн немр сән үзмҗтә Ладьяна Юрийд хойрдгч орм ɵггдв. Эднд бас ирлцңгү кубокуд болн һашгуд бәрүлҗ өгсмн. Марһанд орлцсн цуг шатрчнрт мөңгнә мөрә бәрүлгдв. Хальмг Таңһчин пенсионермүдин ниицәнә ахлач Карвена Нимгр, таңһчин шатрин негдлтин толhач Этән Алексей болн шатрар РДЮСШ-н һардач Матвена Евгений марһанд орлцачнриг йөрәһәд, ут наста бат кишгтә җирһл дурдв.

ШААКУН Василий
Зургт: марһана дииләч Шамкан Анатолий

Видео